Zanin zanlai hian UEFA Super Cup khelh a nih dawna, UEFA Champions League champion lai Chelsea leh UEFA Europa League champion lai Villarreal te an inhmachhawn dawn.
Super Cup hi Northern Ireland khawpui bera awm Windsor Park-ah khelh a ni dawna, he stadium-ah hian mi 18,600 chuang hret leng mahse COVID-19 avangin Super Cup-ah hian entu mipui 13,000 an awm thei dawn a ni.
He inkhel hi Russian referee kum 42 mi Sergei Karasev chuan a vil dawna, VAR lama duty tur hi German referee Marco Fritz a ni bawk ang.
Inkhel hi zanin zanlai 12:30-ah live in a en theih dawna, Sony TEN 2 leh Sony TEN 2 HD-ah te a en theih dawna, online-a en duh tan SonyLIV-ah a en theih bawk dawn a ni.
Super Cup-ah hian 90mins chhungin team hnihte an inhnehtawk chuan Extra Time 30mins dang khelh leh a ni anga, chak zawk an la awm loh zel chuan penalty shoot-out pet a ni dawn a ni.
Chelsea leh Villarreal-te hian substitute bench-ah player 12 ve ve an dah thei dawna, 90mins chhungin substitution pathum an siam thei anga, Extra Time an khelh chuan substitution pakhat dang an siam belh thei bawk dawn.
Cheslea tan Super Cup khel thei lo tur langsar an awm lova, mahse Euro 2020 khel an awm nual avangin pre-season nei mumal lo an awm nuala, Thomas Tuchel chuan a team rem dan tur sawi thiam a har viau.
Villarreal lamah an winger pawimawh Samuel Chukwueze leh midfielder Dani Parejo-te chu inhliam avangin an khel thei dawn lo a, Etienne Capoue, Francis Coquelin, Geronimo Rulli leh Vicente Iborra te an khel thei dawn em tih a chiang lo bawk.
Chelsea hian Super Cup hi kum 1998 khan UEFA Cup Winners Cup an lak hnuah an chawia, hei hi Super Cup an chawi hnuhnun ber niin, kum 2012, 2013 leh 2019 te khan Super Cup khel leh mahse Chelsea hi tlawm zawkah an tang vek. Villarreal hian a vawi khat nan Super Cup an khel dawna, Spanish club-in Super Cup an chawi hnuhnun ber hi kum 2018 kha niin, hetah hian Atletico Madrid an chak.
Chelsea hian a vawi 50 nan Spanish club an tum dawna, Spanish club an tum tawh vawi 49-ah Chelsea hian vawi 20 hnehna changin, vawi 12 an tlawma, vawi 17 an inhnehtawkpui. Chelsea hian Spainish team laka an game hnuhnung 12-ah vawi 2 chiah an tlawma, Spanish team an tum hnuhnung 6-ah chak loh an nei lo.
Villarreal hi European competition-a an game hnuhnung 15-ah chak loh an nei lova, vawi 12 chakin, vawi 3 an tumpui te an inhnehtawkpui ve thung a ni.
Predicted line-up:
Chelsea- Edouard Mendy, Thiago Silva, Cesar Azpilicueta, Antonio Rudiger, Callum Hudson-Odoi, Marcos Alonso, N’Golo Kante, Mateo Kovacic, Hakim Ziyech, Kai Havertz, Timo Werner
Villarreal- Sergio Asenjo, Aissa Mandi, Raul Albiol, Alberto Moreno, Juan Foyth, Alfonso Pedraza, Manuel Morlanes, Yeremi Pino, Manu Trigueros, Gerard Moreno, Fernando Nino
