Sunderland chuan Dick Advocaat kalsan tak an manager hnaruak hnawhkhattu tur an zawng zel a, Real Sociedad enkawl mektu David Moyes hming pawh a ri tel.
Advocaat hian Pathianni khan Black Cats manager anihna hi a bansan a, a hmunruak hnawhkhattu tur hi inrinsiak mek ala ni.
Sunderland hian October ni 17-a West Brom an hmachhawn hma ngeiin manager thar hi neih an duh a, Sam Allardyce, Nigel Pearson leh Burnley manager ni mek Sean Dyche-te ho hming pawh lamrik an ni a, Manchester United manager hlui Moyes hi chu a khan vak lo thung niin an tarlang.
HMING LANGTE HI TUTE NGE?
Sam Allardyce hian a inkhelh ve laiin Sunderland tan hian kum 1980-1981 season khan a khel a, inkhelh a chawlhsan hnuin team enkawl lamah a kal a Bolton, Newcastle, Blackburn leh West Ham United-te alo kaihruai tawh thin.
Kum 52 mi Nigel Pearson thung hi chu nipui lai khan Leicester-in an ban a, season liamta khan Premier League-a game a khelhpui hnuhnung pakuaah vawi sarih a chakpui.
Sean Dyche hian kum hnih liamta khan tuna a enkawl mek Burnley hi Premier League khel turin a kaisan pui a, mahse season liamta khan Championship lamah an tla thla.
Championship season kal mekah parukna an ni a, Dyche hian Sunderland chungchang an zawhna tha takin a chhang lo va Burnley-ah hian rilru ala pek thu a sawi.
Kum 52 mi Moyes hian nikum November thla atanga khan Real Sociedad hi a enkawl tan a, tun season-ah an chetha lo va table mawnglamah a awmpui mek.