Sumit Nagal hi a la hlawhtling ang: Roger Federer

27th August 2019, 10:08PM

Roger Federer chuan US Open first round-ah set a hloh hmasa zet a, Indian tennis player Sumit Nagal chu 4-6, 6-1, 6-2, 6-4 in a lehthal.

Vawi 20 zet Grand Slam title lo la tawh Roger Federer chuan bul a tan tha vak lo hle a, India ram atanga qualifier, World No. 190 ni mek Sumit Nagal chuan set hmasa ber chu 6-4 in a la tlat mai a. Hemi hnuah hian Federer chu a pangngai chho a, Nagal chu chiang zetin a lehthal leh ta a ni.

An inkhelh zawhah hian Federer chuan, “Sawi zui vak a tul ka ti tawh lem lo a, tan lak kha a ngai hle a. Set hmasa ber kha a khirh hle a, Sumit Nagal kha a khel tha khawp mai,” a ti.

“Theihtawp chhuah thin mah ila, duhthusama thaa khelh reng theih a ni bik lo thin a. Kan tum ber chu ni tho mahse, khawvel huapa inelna sang berte zinga mi a ni tawh a, beisei anga khelh loh palh hi awl ve tak a ni. Ka ngaihdanah chuan Sumit khan a khel tha hle a ni,” a ti bawk.

A sawi zelnaah, “Amah khan a theihna kha a hre chiang berin ka ring a. A khel ka ngaihtuah let hian chanchin duhawm tak a la nei chho zelin ka ring a, a la lar chho viau thei a ni,” a ti.

Set khatna an khelh zawha kum 22-a upa Sumit a chungnung ta zawk chuan mak tih a hlawh hle a. A hmuna entute mai bakah TV atanga lo thlirtute pawh set khatna result chuan a barakhaih hlawm hle.

Federer chuan, “Mi reng reng khan a tir atangin result beisei dan kha an lo nei sa vek a. Kei chuan eng emaw thil dang kha ka lo beisei ve thung a ni,” a ti.

“Clay court hmang thiam ka hmachhawn a, ball tihnun zel kha a tum a, khatia tih kha chuan a tan a ngaihthatthlak ber a. A khelh danah khan a inring tawk hle a, a fakawm ka ti hle a ni,” a ti bawk.

Sumit Nagal chuan, “Set khat dang emaw kha chu lak belh ila, chanchin kha a dang daih thei,” a ti.

Copyright © inkhel.com 2024. All rights reserved.