20 Apr 2019 09:31

inkhel

Sum siam nan McGregor ka hnek chak: Amir Khan

Amir Khan chuan UFC star Conor McGregor nen inhnek a hreh loh thu sawiin, Irish fighter nena inhmachhawn chu sum siamna tha tak a nih tur thu a sawi.

British boxer Amir Khan hian naktukah WBO welterweight champion leh pound-for-pound star Terence Crawford chu New York khawpuiah title chhuhsak a tum dawn a. Bolton pa hi a chak a nih chuan a hming a langsar chho lehzual dawn hle a, pawisa lak luh tam theihna a ni tih a hriat chian avangin McGregor nen inhmachhawn hi a chak thu a sawi a ni.

Kum 30-a upa Conor McGregor chuan 2017 khan boxing ring a luhchilh a, boxer pui Floyd Mayweather nen an inhnek a, Conor hi a chak lo nghe nghe a. Amir Khan hian Mayweather hi hmachhawn theih a tum ngar ngar a, a hlawhtling thei ta lo a ni.

Kum 32-a upa Amir Khan chuan MMA fighter McGregor nen inhnek theihna hun awm ngat se a hawisan phal dawn loh thu a sawi.

Khan chuan, “Conor McGregor nen hian inhnek thei dawn ila chuan ka tlanchhe dawn lo chiang khawp mai a. McGregor hnek theih te chu thil chakawm a nih piah lamah sum siamna tha tak a ni dawn chiang a ni,” a ti.

“Tun dinhmunah chuan Floyd Mayweather te tan sumdawnna khawvel tha tak a ni mek a. Floyd hnen atang hian keini pawh kan inzir ve zel a, a duh ang tak inhnek a awm theih nan kawng a hai kaw thiam riau zel a, hetianga tih dan hi kan zir chho ve mek a ni,” a ti bawk.

A sawi zelnaah, “Conor McGregor vs Amir Khan chu miin an ngaihven viau dawn a, inhnek ropui tak a ni dawn chiang a. Irish leh English inhnek a nih dawn avangin a theuneu dawn lo tih a chiang sa a ni,” a ti.

“Chutiang chu a thleng dawn a nih ngat chuan ka hnungchhawn lo chiang ngawt ang,” tiin Amir Khan chuan a sawi.