Subroto Cup Under 14 boys champion Mizoram team chuan Mizoram an rawn thlen leh hnuah lawmpuitu an ngah hle a. October 1, 2015 (Ningani) khan Pu Zodintluanga (Sports Minister) hova lawmpuina hun I&PR Auditorium-a hman a nih hnuah Mizoram State Sports Council chuan an office, infiammite inpuiah lo dawngsawng lehin, Pu C.Laltlanthanga (MSSC Secretary) chuan lawmpuina thil pek, bag tha tak a lo hlan theuh.
Pu Laltlanthanga chuan, " Sports-a kan nghaih pawimawh thin chu kum dik tak a ni. Vawiina India ram champion kan naupangte kum hi dik tawk lo a awm mai thei a, mahse an dik tlangpui ang tih ka ring. Mizote hian hlawhtling tura kan tlakchham ber chu tih tak takna a ni. Kan ei leh in chhia leh retheihnate hi kan chhuanlam fova, hman atang khan TNT chuan infiamna hrang hrangah International player engemawzat an lo chherchhuak tawh a ni. A pawimawh ber chu hlawhtlin pui ngei tura tih takzeta kan luhchilh hi a ni" a ti.
Mizoram State Sports Council enkawlna hnuaiah Sports discipline hrang hrang enkawltu Association 32 an awm mek a, an hlawhtlinna te lawmpuina hun a hmang thin a. Subroto Cup champion team te hi MFA hminga kal ni lo mahse ram hming tithatu, Sports-a hlawhtlinna pawimawh tak a nih avangin Mizoram State Sports Council chuan chawimawi leh lawmpui hi kan tihmakmawh ani a ti bawk.
U-14 boys Subroto Cup International Football Tournament-2015 champion team te hi Sports & Youth Services Department Regional Sports Training Center, Saidan, Kolasib atanga zirte an ni a. Govt. Chawngfianga Middle School Saidan, Kolasib hminga kal an ni.
Best Player Award dawngtu Chhunga Hmar, Kolasib chuan Rs. 40,000/- leh laptop a dawng a; Best Goalkeeper dawngtu Lallawmkima, Dinthar chuan Rs. 40,000/- Best Coach Award dawngtu R. Lalthawmmawia’n Rs.40,000/- dawngin, Champion team te hian Championship Trophy leh Rs.2,50,000/- an dawng an ni.