​Suarez khel thei lo tur Poche-a’n a ui

11th December 2018, 07:12PM

Champions League group stage inkhel tawp berah Tottenham chuan Camp Nou-ah Barcelona an luhkhung dawn a, an tlawm thiang lo.

Barcelona hian round of 16 an lut chiang tawh a, Tottenham erawh pahnihnaah awmin pathumnaa awm Inter Milan nen an point a inang chiah. He inkhelah hian Barcelona forward Luis Suarez chu a inlan thei dawn lo tih Barca boss Ernesto Valverde chuan a sawi a, Tottenham manager Mouricio Pochettino chuan Suarez khel thei lo tur chu pawi a tih thu a sawi ve bawk.

Poche chuan, “Suarez khel thei lo tur hi Barcelona tan chuan channa nasa tak a ni ngei a, Harry Kane nen hian khawvela striker tha ber zinga mi an nih avangin a khel thei lo tur hi a pawi hle. Ram hrang hrangah Suarez hian a that zia a pholang tawha, a bikin Liverpool leh Barcelona-ahte tunlai striker tha ber zinga mi a nih zia a lantir tawh. Player pawimawh tak a ni a, Barcelona tan chuan channa nasa tak a ni,” a ti.

Tottenham striker Harry Kane chu club lian zawkin an lei chhuah thuai ringtu an tam hle a, hemi chungchang hi Poche chuan sawiin, “Club lian zawkin club te zawk player tha te an leichhuah hi kan lo hmu fo tawh a; La Liga leh Premier League-ahte a thleng fova, club hausa zawkin club hausa lo zawk player pawimawh an chhuhsak fo.

“Real Madrid pawhin Manchester United chu Cristiano Ronaldo an lo chhuhsak tawh a, chuti ang chiah chuan Philippe Coutinho pawh Barcelona-in Liverpool atangin an lo leichhuak tawh bawk. Kawng hrang hrangin a lo thleng fo tawh thin a, hun lo la awm zel turah pawh a la thleng zel dawn. Mahse heti ang thil hi sumah chauh a innghat lova, player duhdanah pawh nasa takin a innghat a ni,” a ti.

Copyright © inkhel.com 2024. All rights reserved.