12 Jul 2020 08:36

inkhel

Styrian Grand Prix-ah Lewis Hamilton a chungnung ber

Lewis Hamilton chu Austria rama Formula 1 intlansiak thar Styrian Grand Prix an tlanah pakhatna a ni a, a teammate Valtteri Bottas chu pahnihna niin, Max Verstappen chu pathumna a ni.

Formula 1 world champion ni mek Lewis Hamilton chu qualifying atangin a che tha hle a, pole position atangin a tlan tan nghe nghe a. Tun season-ah pakhatna a nih vawi khatna niin, heti hian F1 season 14 chhungin season tin pakhatna nihna a la nei ziah a ni.

British driver Hamilton hi nimin lama qualifying an tlanah pahnihna atanga tlan tan, Red Bull driver Max Verstappen aiin second 1.2 in a thleng hma zawk a. Vawiina an intlansiakah hian Verstappen hi pahnihna a ni dawn emaw tih laiin Mercedes driver pakhat zawk Valtteri Bottas chuan a lehpel leh hlauh mai a, Verstappen chu pathumna a ni ta zawk a ni.

Red Bull driver pakhat zawk Alex Albon chu palina niin, McLaren driver Lando Norris chu pangana a ni a. Racing Point driver pahnih Sergio Perez leh Lance Stroll te chu a hnungah hian an thleng bawk a ni.

Renault driver Daniel Ricciardo chu pariatna niin, McLaren driver pakhat zawk Carlos Sainz chu pakuana a ni a, sawmnaah Alpha Tauri driver Daniil Kvyat a thleng bawk a ni.

He intlansiakah hian Ferrari driver pahnih an che fuh lo a, a tirah Sebastian Vettel leh Charles Leclerc te chu an insu palh a, hei vang hian an tlan tluanchhuak thei ve ta lo a. Kum 22-a upa Leclerc chuan an chetsualna chu a thiamloh a nih thu a sawi chhuak.

Mercedes driver Lewis Hamilton hi a vanglaiin vawi 85 a chak ta chiah a, heti hian Formula 1 driver ropui bera sawi Michael Schumacher-a record, vawi 91 chak theih chu a hnaih chho zel a, record nihrual tur hian vawi 6 chak chiah a mamawh tawh a ni.

TOP 10

1. Lewis Hamilton (Mercedes)

2. Valtteri Bottas (Mercedes)

3. Max Verstappen (Red Bull)

4. Alex Albon (Red Bull)

5. Lando Norris (McLaren)

6. Sergio Perez (Racing Point)

7. Lance Stroll (Racing Point)

8. Daniel Ricciardo (Renault)

9. Carlos Sainz (McLaren)

10. Daniil Kvyat (Alpha Tauri)

THE REST

11: Raikkonen

12: Magnussen

13: Grosjean

14: Giovinazzi

15: Gasly

16: Russell

17: Latifi

Retired: Ocon, Leclerc, Vettel