Liverpool striker Daniel Sturridge khel bawr (hip) hliam chu United States-ah hlawhtling taka zai a ni.
English striker hian March thlaa Manchester United an hnehloh hnu khan game hnih chiah ala khel a, tun season chu hliamin a tlakbuak char char a tih theih.
An zai zawh hnuin kum mi 25 Sturridge chuan, "Ka khel bawr hliam chu hlawhtling taka zai a ni tih hi khawvel hriatah ka puang duh a, Pathian hnenah hlawhtling taka min zai theih avang hian lawmthu ka sawi duh bawk a min ngaihventute chungah pawh ka lawm a ni." tiin a sawi.
Kum 25 mi Sturridge hian season hmasa khan goal 24 a khung a, Premier League-ah Liverpool pahnihna a nihpui bawk. Tun season-ah erawh a vanduai a, hliamin a hun pum a tibuai a ni deuh ber.
Nikum September thla khan malpui hliam vangin a buai tan a, October thlaah an training laiin a chawn bawrah hliam a nei leh a November thlaah a malpui bawk hliam lehin kumin January ni 31 hma kha chuan vawikhat mah a inkhel leh lo.
Liverpool tan a khelh hnuhnung ber chu April ni 8 khan a ni a, FA Cup quarter-final replay-ah Blackburn an hmachhawn a minute 85-naah thlak a ni.