Lallianzuala Chhangte chuan India national team coach thar Igor Stimac kaihhruaina hnuaia inkhelh vat vat a chak tawh thu a sawi.

Delhi Dynamos winger chuan ram tana khelh leh theih a inbeisei hle a, All India Football Federation in India national football team coach thar atana Igor Stimac an rawih hnuah hmun chan theih a inbeisei thu sawiin, coach mit tlung tura tan lak a tum thu a sawi a ni.

India ram football khawvelah chuan Lallianzuala Chhangte hi thawm nei tha berte zingah a tel chho mek a. Indian Super League (ISL) club Delhi Dynamos tan pawh player pawimawh berte zinga mi niin, tun hnaia New Delhi khawpuia national camp lo awm turah theihtawp chhuah a tum hle a, national team-ah hmun chan theih ngei a tum hle.

Mizo tlangval Lallianzuala chuan, “Coach thar hi pa tha tak mai a ni tih ka hria a, khawvel hmun hrang hrangah tawn hriat a lo nei teuh tawh a. A kaihhruaina hnuaia inkhelh ve theih ngei hi ka chak a, chutiang hun chu a thlen theih ngei pawh ka beisei a. A hnuaia khelh a, ram aiawha feh chhuah theih ngei hi ka duh hle a ni,” a ti.

Ram tana Lallianzuala feh chhuah hnuhnun ber chu Bangladesh rama 2018 SAAF Cup an khelh tum kha a ni a. India chuan U-23 team te chu an khelhtir a, Pakistan nen an inkhelh tumin Lallianzuala Chhangte hi a lut a ni.

Igor Stimac hian Croatia national team pawh a lo enkawl tawh a, 2014 World Cup qualifying play-off a hruai thleng thei a. National team a enkawl bakah hian club lamah pawh tawn hriat a nei ve nual tawh a. Hajduk Split chu 2004-05 season-ah khan Croatian First Football League title a lakpui a, hemi kumah tho hian Croatian Football Cup final a luhpui bawk.

Tun hnaiah Asia khawmualpui lamah hun a hmang ve nual a, Iran club Sepahan leh Qatar club Al-Shahania te chu a enkawl tawh a ni.