India football coach Igor Stimac chuan Asian Cup champion lai Qatar chu goal awm lova an inhnehtawkpui hnuah India team sawiseltu te a chhang let.

2022 World Cup leh 2023 Asian Cup joint-qualification inkhelah India hian Qatar khawpui ber Doha-ah Qatar an hmachhawna, India hi bet zawk hle mahse goal khung thei an awm lova, 0-0 a inhnehtawkin India hian point khat hlu em em mai an hlawhchhuak.

India hian Qatar an hmachhawn hma chiah hian Oman an hmachhawna, si khat faia hma an hruai reng hnuah 2-1 in an tlawm zuia, mi tam takin India team hi sawiselin, an in fit tawk lo leh an chau niin an sawi.

Thawhtanni lam khan press-conference-ah Stimac hian an chauh emaw an in fit loh vanga Oman hneh lo an nih loh thu a lo sawi tawha, chu chu Qatar lakah a dik zia kan hmu pawh a tih theih awm e.

Stimac chuan, “Mi min sawiselna zawng zawng hi a mal tete in ka chhang seng lova, chhan theih pawh a nilo, a chhan chu mi zawng zawng hian football hi an hrethiam vek kher lo. Team fit tha tak kan ni a, chu chu Qatar lakah kan lan tir.

“Qatar kan khelhpuia, hun tawp lamah pawh space kan la insiam theia, minute 95-naah pawh chak tak tak kan la tlan a, kan in fit zia a langin ka hria. Asia-a champion lai lakah point kan hlawhchhuak hrim hrim hi ka lawm hle a, ka player-te mai ni lovin Qatar player-te pawh ka lawmpui bawk a ni,” a ti.