US Open champion hlui American tennis player Sloane Stephens chu WTA Finals, Singapore-a neih turah a vawikhat nan a in vaw tling.

Stephens hian Grand Slam champion tawh dang Simona Halep, Angelique Kerber, Naomi Osaka, Petra Kvitova leh Caroline Wozniacki-te hnung zuiin tun thla October ni 21 atanga ni 28 thlenga neih tur WTA Finals a khel dawn.

WTA Finals-ah hian player pariat an tel thei a, a tel tur paruk an chiang tawh a, pahnih dang tel tur hi a la chiang lova, Elina Svitolina leh Karolina Pliskova-te chu rinkai ber an ni thung. WTA Finals-ah hian champion lawmman hian dollar maktaduai 7 lai a keng tel a ni.

Stephens hi kumin French Open-ah pahnihna niin, final-ah Simona Halep a hneh lo. Stephens chuan a vawikhat nana WTA Finals a khelh tur chungchang hi sawiin, “A vawikhat nan WTA Finals khel tura ka tling hi ka lawm hle a, tun season-a player tha ber berte nen a kan inel tur hi ka phur tawh a ni,” a ti.

Kum 2017 khan Stephens hi US Open-ah champion-in kumin khan quarter final-ah Anastasija Sevastova a hneh lo. Kuminah Stephens hian Grand Slam title lak a nei lova, Osaka chuan US Open a la a, Kerber-i’n Wimbledon a lak bakah Wozniacki chuan Australian Open a la bawk a ni.