Arunachal Pradesh, Manipur leh Meghalaya boxer-te chuan boxing an khelh tawhah Yodha 4x4 Pickup LPS Pro Fight anga boruak nuam leh ropui an la tawng lo.
Mizoram Boxing Association Senior Vice President Pu F Lalnienga chuan sawm bik state dang atanga lo kalte an hlim hle a, Pro Fight ropui an tih thu an sawi nasa a, thil lawmawm tak a ni, a ti.
National referee Pu Nienga chuan : "An hlim hle a, hetianga mipui pung khawm tam hmaah an la inhnek ngai lo tih an sawi hlawm. Boruak a ropui an tiin Pro Fight anga mipui au thawm nasa tak hnuaiah an la inhnek ngai lo va, buatsaih a nih dan leh thil kalphung hrang hrang fel fai an tiin an fak hle a ni," a ti.
Arunachal Pradesh atangin boxer pathum - Heli Tana Tara (lightfly), Kogam Potom (bantam) leh Peken Siga (light) an tel a, Siga tla tawhin Tana Tara leh Potom chuan quarterfinal an lut.
Manipur atangin boxer pahnih - W Alexander Meitei (bantam) leh KH Samanacha Singh (middle) an tel a, quarterfinal an lut ve ve. Meghalay atanga tel pahnih Pynskhem L Nonglait (lightfly) leh Dondor Marwein (light) pawhin round of 16 an paltlang. Mahse, Nonglait hian a mitko tauh kakin hliam na tak a tuar a, a khel zawm thei lo tura ngaih a ni.
Manipur team hruaitute chuan an boxer pahnihin title an hawn ngei an ring a, Arunachal team hruaitu chuan kawnghren pakhat tal an lak theih a beisei bawk. Meghalay-in boxer rintlak pakhat chauh nei tawh mah se kuttum hlauhawm tak Marwein-a chungah beisei an nei sang em em.
Pu Nienga chuan state dang atanga telten title an lak zawh a ring lo ve thung a : "Kan naute an tha a, Mizoram hi Indian boxing-ah kan nep lo. State dang boxer-ten an khelh tawh atanga thlirin title la tur an awm ka ring lo. Mahse, thil kal zel dan tur erawh sawi lawk theih a ni lo," a ti.
India ramah induhsakna leh inthliarna a awm thin nia sawi a ni a, Pu Nienga chuan Pro Fight-ah state dang boxer-te en hran an ni lo va, a dik thei ang berin an kalpui zel dawn a, Indian boxing tan entawn thama thiltih an tum tih a sawi.
"Round of 16-ah state dang boxer pasarihin an khel vek a, pakhat chiah a chak lo. Judge-te endik dan a tha tawk hle a, inelna sang chho deuh deuh dawn mah se a dik thei ang ber zelin kalpui kan duh a, Organising Committee duh dan leh rorel dan pawh a ni nghe nghe.
"Tunah pawh hian Indian boxing hruaitute hnenah kan judgement leh thil awm dan kan hrilh vek a, state dang kan en dan an hriatin tha an ti a, hei hi a tawp thlenga chhawm kan tum. Anmahni state dang boxer-te pawhin Pro Fight hi ropui takin an sawi zui dawn tih a chiang a, chuvangin dik lo a awm palh chuan a pawi thei a, kan fimkhurin kan uluk hle a ni," a ti.
Quarterfinal atanga Title Fight thlengin round 5 an khel tawh dawn a, Mizo boxer eng emaw zatin tawn hriat an neih tawh laiin state dang boxer tan thil thar a ni ang.
February ni 28, Ningani 8:00PM - Bout 5 Fixtures
LIGHTFLY
Pynskhem L Nonglait (Meghalaya) v Lallawmawma (Tuipui)
BANTAM
Vanlalzawna (Niawhtlang) v HC Lalramfela (Chawngtlai)
LIGHT
Zochhuanawma Fanai (Republic Veng) v Dondor Marwein (Meghalaya)
Zomuansanga (Khatla South) v Boyka Lalhriatsanga (Vaitin)
MIDDLE
Benjamin D Lalruatfela (Kolasib) v C Lalduhawma (Ramhlun South)
March ni 1, Zirtawpni 8:00PM - Bout 5 Fixtures
LIGHTFLY
F Lalmuanzuala (Sihphir) v Zorammuana (Tuipui)
BANTAM
Yuri Lalbiakdika Sanate (Vaitin) v W Alexander Meitei (Manipur)
LIGHT
Lalruatkima (Model Veng) v Lalnunzawma (Bualpui NG)
MIDDLE
Lallawmkima Sailo (Chaltlang Lily Veng) v K Lalpianglawma (Sihtlangpui)
KH Sanamacha Singh (Manipur) v H Lalrinhlua (Hnahthial)