Premier League inkhelah Chelsea chuan Stamford Bridge-ah Manchester United an lo mikhuala, United hian si hnih faiin hnehna an changa, kum 1987-88 season hnuah season khat chhungin United hian Chelsea chu home leh away-ah an hneh leh vawi khatna a ni.
He inkhelah hian United tan hian Anthony Martial leh United captain Harry Maguire-te chuan goal khat ve ve an khunga, an team chu point 3 pawimawh tak an hlawhchhuahpui.
Khelh 26-ah Chelsea hian point 41 hlawhchhuak tawhin palinaah an awm chhunzawm zela, an hnuai chiaha awm Tottenham nen point khat chiahin an inthlau. United hian khelh 26-ah point 38 hlawhchhuak tawhin, anni hi pasarihnaah an awm mek a ni.
Chelsea 0-2 Manchester United
(Martial 45’, Maguire 66’)
Shots: 17-9
Shots on target: 1-3
Pass accuracy: 87%-80%
Possession: 61%-39%
Player Ratings
Chelsea: Caballero 6; James 6, Christensen 6, Rudiger 6, Azpilicueta 7; Kante 6, Jorginho 6, Kovacic 7; Willian 7, Batshuayi 5, Pedro 7 Subs: Zouma 6, Mount 6, Giroud 6
Manchester United: De Gea 6; Wan-Bissaka 7, Bailly 7, Maguire 7, Shaw 6, Williams 6; Fred 7, Matic 6, Fernandes 8; James 6, Martial 7 Subs: Romero, Dalot 6, Jones, Pereira 6, Mata, Greenwood, Ighalo 6
Inkhel an tana, Chelsea game a rang viau. 5mins vel khelh a nihin Chelsea lamin chance tha tak an neia, veilam atangin dinglamah Recce James chu ball a pek a ni a, James chuan dinglam atang hian far post lamah, lei hrulah shoot-in a teuh hle a, a goal lo chiah chiah.
James-a’n chance tha neih hnu lawk hian Pedro chuan United box bulah ball a changa, a chhaka awm Willian a pe, Willian hian box chhungah ball chawkin, dinglam atangin a cut lut thuta, a veilamin goal-ah ball chhuihin a teuh viaua mahse goal a zawn lo hret.
10mins chuang hret khelh a nihin Chelsea midfielder N’Golo Kante chu a inhliama, khel chhunzawm thei lovin lak chhuah a ni a, a aiah Mason Mount dah luh a ni. Hemi hnu lawk hian United chuan veilam atangin Chelsea an nawra, Daniel James chuan Chelsea box pawn veilam atang box chhungah ball cross lut mahse, lo khawih thei an awm lova goal kick a ni zui.
Minute sawmhnih khelh a ni a, ball an umna lamah Chelsea striker Batshuayi leh Maguire-te chu line pawnah an inum chhuaka, Maguire hi tlu in a hnunga rawn la tlan Batshuayi chu a kap bawrah a lo tlawha, a tlawh lui ngei niin lang mahse VAR chuan red-card pekna thamah a ngai lova, VAR thutlukna hian midang tam tak ngaihdan erawh a kalh a tih theih a, United captain hlui Roy Keane pawhin Maguire chu a vannei hle tih a sawi nghe nghe.
25mins chhoah Chelsea lamin chance tha em em mai an nei leha, United box chhung veilama inpawt lut Mount chu tha zetin Pedro chuan ball a pe; Mount hian goal hmazawna awm Michy Batshuayi chu pass-in Batshuayi hian goal-ah lo pet luh tum mahse goal zawnah a pet thei lova, chance tha tak erawh a ni chiang hle.
Darkar chanve chuang hret khelh a nihin Chelsea lam an hlauhawm lehpek viaua mahse United lam chuan hlauhawma a chhuah hma in an lo hmet mit. Anthony Martial pawhin 35mins chho ah chance a nei a, veilam atangin Chelsea box chhungah ball a khalh luta, far post lamah pet mahse goal a zawn tawk lo.
Half time hma deuhin Wan-Bissaka leh Fred te chu dinglamah ball an inpe a, Wan-Bissaka hian Chelsea box pawn dinglamah nalh taka ball chawkin tha zetin ball a cross lut bawka, Martial lo chuan goal-ah lo tauh lutin United chu Stamford Bridge-ah hma a hruaipui. Half time hma chiahin Chelsea lamin an si phurh sutna hun an nei a, mahse Batshuayi chuan a chance tha neih a hmang tangkai lo hle.
Second half an khela, 10mins khelh a nih hma chiahin Pedro chuan chance tha tak nei mahse Wan-Bissaka chuan a shot a lo khawih per sak. Hemi hnu lawkah Chelsea goal an khunga, corner atanga ball vawrh luh chu Kurt Zouma chuan lo tauh lut mahse VAR-a endik niin, Azpilicueta chu a lo foul avangin goal hi sut leh a ni.
Darkar khat chuang hret khelh a nihin Pedro chuan anmahni box pawn chiahah Fred a ti tlu a, United-in freekick an hlawhchhuak. Bruno Fernandes chuan freekick hi petin a pet tha hle a, mahse si ban a per. Unted hian corner hmu zuiin, corner atang hian Fernandes chuan ball a vawrh luta, khawvela defender manto ber Maguire chuan goal-ah lo tauh lutin si hnih faiin United chuan hma an hruai.
72mins velah Matteo Kovacic chuan chance tha tak box chhung atangin a nei a, mahse a shoot rual chiah Eric Bailly chu a rawn slide-a a rawn block hman. 77mins-ah Mount chuan dinglam atangin United box chhungah tha takin ball a cross pheia, Olivier Giroud chuan nnalh takin lo tauh lutin Chelsea tan goal khung mahse VAR lamah a ke a offside avangin goal hi sut leh a ni.
Hun tawp hnaih lamah Fernandes chu James-a laka a foul avangin Chelsea chuan freekick an hlawhchhuaka, freekick atang hian Mount chuan petin, pet tha viau mahse si ban a pera, a goal teuh hle. Injury time-ah Jorginho pass sual atangin United striker thar Odion Oghalo chuan chance tha tak a neia, mahse Chelsea keeper Willy Caballero a paltlang thei lo. Chelsea hian an si phurhte sut tum hle mahse a tawp thlengin goal an khung thei lova, United chuan si hnih faiin Stamford Bridge-ah hnehna an chang ta a ni.