Chelsea chuan Premier League inkhelah Watford chu Stamford Bridge-ah an lo mikhuala, Chelsea hian an mikhual hi 3-0 in an lo hneh.
Chelsea tan hian Olivier Giroud, Willian leh Ross Barkley te chuan goal khat theuh khungin, top 4-a awm an tumna kawngah hnehna pawimawh tak an chang.
Khelh 33-ah Chelsea hian point 57 an hlawhchhuak tawha, panganaah tla thla zuai mahse palinaah an chho leh nghal. Watford dinhmun a derthawng hle a, anni hian khelh 33-ah point 28 hlawhchhuak tawhin, 17-naah an awm ve mek thung.
Chelsea in a tir atangin inkhel an thunun nghala, darkar chanve khelh a nih hma hretin, Mason Mount leh Barkley te tha taka in combi-in Giroud-a goal tur an siamchhuah saka, Chelsea hian hma an hruai.
Half time hma lawkin Christian Pulisic chuan Chelsea tan penalty a hlawhchhuaka, ani hian Etienne Capoue chuan box chhungah a titlu in, Chelsea penalty hlawhchhuah hi Willian chuan goal-ah a chan tir a, Willian hian Chelsea tan penalty vawi khat mah a la hlah lo.
Second half-ah pawh Chelsea hian an khel tha zawka, Watford goalkeeper Ben Foster chuan Giroud leh Willian te chance neih chu tha tak takin a lo save.
Drinks break zawh hnuah Watford lam hi insanmar tum viau mahse eng an ti thei lova, Danny Welbeck chuan 80mins hnuah chance tha tak nei mahse Chelsea keeper Kepa Arrizabalaga chuan tha zetin a lo save a, hei hi Watford hlauhawm ber tum a tih theih.
Chelsea hian si hnih faia chak mai an duhtawk lova, injury time-ah goal an khung belh; Pulisic chuan veilamah Azpilicueta chu ball a pe a, ani hian Barkley a pe ve leh, Barkley hian a ke hmanthiam loh lam, a ke veilamin, yard 10 vela hla atangin goal-ah ball a pet luta, 3-0 in Chelsea hian hnehna an changa, Watford hian kum 1986 May thla atangin Stamford Bridge-ah hnehna an la chang lo tluang zel a ni.
Chelsea 3-0 Watford
(Giroud 28’, Willian 43’pen, Barkley 90+2’)
Player Ratings
Chelsea: Kepa 6; James 7, Zouma 7, Christensen 6, Azpilicueta 6; Kante 7, Mount 7, Barkley 7; Willian 8, Giroud 7, Pulisic 7 SUBS: Gilmour 6, Loftus-Cheek 6, Hudson-Odoi 6, Abraham 6
Watford: Foster 7; Femenia 6, Dawson 6, Kabasele 6, Mariappa 6; Hughes 7, Chalobah 6, Capoue 5, Doucoure 6, Sarr 6; Deeney 6 SUBS: Cleverley 6, Welbeck 7, Masina 6, Pereyra 6
