Paris-ah misual 6 ten bomb leh silai hmangin khawpui an bei a. Mi 130 an thi nia report a ni.
Tin, heti hi a ni a, Stade de France-ah France leh Germany te chuan friendly match an khel. He Stadium atang hian bomb puahna leh inkahna a thlenna hmun a hla lo, France leh Germany-te inkhelh lai hian bomb puak pawh a hriat theih nghe nghe, a ring khawp mai.
Si hnih faiin France chuan hnehna an chang a, inkhelh zawhah Stadium pawna chhuah ngam a la ni lo, security duty te chuan Stadium chhungah awm rih turin fans te chu an ti a. Fans-te hian pawn lama thil rapthlak tak thlen dan kimchang an hre tawh bawk a, hlau thawng takin khelmualah an pungkhawm.
Paris hian terrorist beihna a lo tawk nual tawh a, tun tum hi chu a rapthlak ber pakhat a ni tlat mai le. Rei ngial Stadium chhunga an awm hnuah a him ta tih hriattir an ni a, an chhuak ta hlawm a. An chhuah pah chuan French Football fans tam tak chuan hnam hla an sa hluah hluah ta mai. Chhiat an tawk, President-in State emergency a puang, an ralkhel a, Paris a lungngai. Chuti chung chuan Football fans-te chuan chhuang takin an hnam hla an sa a, an ram tan a ding a, he video hian mi tam tak mittui a ti tla hial a ni.