November ni 19-24, 2019 chhunga Sr.National Muaythai Championship 2019, Mangaluru, Karnataka khelh zawh takah Mizoram chu Overall champion an ni.

Ballalbagh sports complex, Mangalore-ah Senior National Muaythai Championship 2019 neih a ni a, Mizoram chuan gold 10, silver 1 leh bronze 1 dawngin a pumpuiah pakhjatna an ni. Pahnihna a thlengtu Karnataka chuan gold 6, silver 9, bronze 15 lain pathumna Kerela chuan gold 5, silver 6 leh bronze 8 an la ve bawk.

Weight category 42-a inelna a awm a, State 27 atangin players 354 leh official 50 an tel thei. Mizoram atangin players 15 leh official 2 an tel a, players ngah ber Madhya Pradesh chuan players 62 neiin Karnataka chuan players 43 an thawhchhuak ve bawk a, pathumna Kerala pawhin players 30 an thawhchhuak thei.

India hmarchhak atangin tel an thahnem a, Assam players 19, Manipur 3, Arunachal 2, Tripura 17, Sikkim 25, Meghalaya 22 telin players nei tlem ber zinga mi Mizoram chu a pumpuiah an champion thei a ni.

45 kg-ah Benjamin Zonunsanga, Luangmual chuan final-ah Ashu Kumar, Madhya Pradesh hnehin round 3 inbeihnaah a chungnung tluan a, judge ten Unanimous Decision-in an chaktir. -54kg final-ah Lalruatkima, Falkland chuan Mohammed Abdul, Telengana chu UD bawkin a hneh. -63kg-ah Vanlaldingngheta, Khatla East chuan a khingpui Bantip Langhlong, Meghalay chu round hnihnaah knock out-in a champion a, heng mite hi kum 17-23 inkar, Elite Group-a khelte an ni.

Competitive Group 23-40 yrs inkarah -48 kg inelna final-ah Joseph Vanlalhruaia, Hunnthar chuan a khingpui Babit Kharsahnoh chu UD 30-27, 30.27, 30-27 a hnehin a champion a, Joseph-a hi Best Fighter-ah thlan zui a ni nghe nghe.

Paul HD Lalruatkima, Phuaibuang/Selesih chuan a khingpui Sushanta Debbarma, Tripura chu -54kg final-ah hnehin round 1-naah a knockout a, Paul hian quarterfinal-ah a khingpui a knockout nghe nghe bawk a ni.

86kg inelna final-ah Lalthasanga Lelhchhun, Venghlui chuan a khingpui Ravish Sahani, Maharashtra hnehin a champion a, -91kg final-ah Ngurlianzuala Sailo, 3rd Bn.MAP chuan Balkaran Singh, Maharashtra hnehin a champion bawk.

Hmeichhe final -51.kg-ah K.Lalhmingmawii, Leitan chuan Kerala player hnehin a champion a, 54 kg-ah Hmangaihtlansangi, Chamring chuan Kerala player hnehin

63kg-ah Jacinta C.Zomuanpuii, Chaltlang chuan Kritika, Karnataka a hnehin a champion ve bawk. Liansangpuii Renthlei chu final-ah a chak zo lova, Lalhriatpuia, Kawlkulh pawhin Mizoram tan bronze medal a dawng ve bawk a ni.

Sr.National Muaythai Championship neih rual hian Professional Fight neih a ni nghal bawk a, Mizo players-ten tel duh viau mahse sum lam harsatna avangin an tel thei lova, tel chhun Benjamin Zonunsanga chuan -45kg final-ah a khingpui knockout-in a champion nghe nghe.

Mangaluru-ah hian United Amateur Muaythai Association of India (UAMAI) hruai thlanna leh General Body Meeting neih nghal a ni a, Mizoram aiawhin President Brian Lalnunhlima leh Jt.Secy.H.Lalmuanpuiate an kal a, UAMAI Officials ni sa K.Hrangzuala, Gen.Secy leh Samuel Lalrozama Hmar, Technical Chairman te pawh an kal ve bawk.

India ram champion team hian  November ni 25, 2019 hian Mangaluru chhuahsanin Mizoram an chhuahsan dawn a, Team coach cum player  Liansangpuii Renthlei, Mizoram Police leh Manager C.Lalnunmawii, Durtlang Leitan ten an hruai a ni.