Squad hlutna sang ber Manchester City

04th September 2019, 03:09AM

Manchester City chuan player lei nan pawisa an hmang hnem ve ta hle a, hetiang a nih avang hian tuna an squad hlutna chu an thenawm club Manchester United squad hlutna let deuh thaw niin an sawi a. Khawvelah City squad hlutna hi a sang ber a ni.

Tun hnaia Transfermarkt in an chhut danin Premier League champion Manchester City squad hlutna hi £1.15 billion vel zet a ni a. Hetih lai hian an khaw club lian dang Manchester United squad hlutna chu £644.6 million niin, an squad hlutna hi City squad hlutna chanve ang deuh thaw a ni.

Pep Guardiola pawlte hlutna hi Ole Gunnar Solskjaer pawlte hlutna aiin £180 million velin a sang zawk a. City-ah hian player 23 an awm a, an hlutna lak khawm £1.15 billion a nih chuan player hlutna chawh rualin pakhat £49.40 million man zel an ni ang.

Liverpool chu squad hlutna sang ber dawttu an ni a, an squad hlutna belh khaw chu £959.18 million niin, player 22 an nei a. An player te chu pakhat £42.60 million ang vel zel an ni.

Player 24 nei Tottenham Hotspur squad hlutna belh khawm chu £881.55 million a ni a, pathumnaah awmin, player pakhat zel chu £36.73 million ang zel an ni a. Palinaa awm, player 26 neitu Chelsea squad hlutna chu £697.95 million a ni a, player pakhat chu £26.84 million man ang zel an ni.

Manchester United chu panganaah an awm a, squad 25 an nei a, an squad hlutna £644.63 million niin, player tinte hi £25.79 million zel an ni a. Player 24 neitu Arsenal chu paruknaah an awm a, an squad hlutna belh khawm hi £570.38 million a ni a, player pakhat zel chu £23.77 million man ang an ni.

Everton (£457.20 million), West Ham United (£299.03 million), Leicester City (£345.83 million) leh Wolverhampton Wanderers (£277.07 million) te chu Top 10 huangah an awm hlawm a ni.

Pakhatnaa awm Manchester City chu khawvelah pawh squad hlutna sang ber an ni a, anmahni ang bawk hian Real Madrid leh Barcelona te pawhin £1 billion hi an pel ve bawk a ni.

Copyright © inkhel.com 2024. All rights reserved.