​Spurs vs United game-ah enge kan hmuh?

14th January 2019, 05:01PM

Pathianni zan khan Wembley Stadium- ah Manchester United chuan mual neitu Tottenham chu Rashford-a goal khat hmangin si khat faiin an hneh a, Ole Gunnar Solskjaer-a hnuaiah United chuan game 6 (League game 5 & FA Cup game 1) khel tawhin hnehna a chanpui vek. United boss lo ni tawh zingah game hmasa paruka hnehna la chang vek thei awmchhun chu Solskjaer a ni ta a ni.

Solskjaer chuan Premier League game 5-ah point 15 lai a hlawhchhuahpui a, West Ham lakah Arsenal an lo tlawm bawk avangin United chuan point-ah Arsenal an nihrual. Khelh 22 atangin team hnihte hian point 41 ve ve an hlawhchhuak a, goal difference-ah Arsenal an chungnun zawk avangin table-a an awmna erawh a danglam lo.

Tottenham 0-1 Manchester United (Game bihchianna)

Solskjaer-a'n United a enkawl atangin attacking game hmuhnawm tak an khel chho. Tottenham erawh Pochettino-a hnuaiah attacking game hmuhnawm tak an khel reng. Hmatawng viak tha tak tak nei ve ve team an ni a, United lamin 4-3-3 formation an rawn hmang a, Martial, Rashford leh Lingard te hnungah Pogba, Matic leh Herrera te an awm.

Tottenham chuan 4-1-2-1-2 formation an rawn hmang a, Kane leh Son te chu hmatawngah awm mahse a nihna takah chuan 4-3-3 angin an khel tho kan ti thei awm e. Solskjaer chuan tactic danglam deuh a rawn hmang deuh thut a, Lingard chu a sirah dah mahse Rashford a tawlh chhuak thut a, a laiah midfield pui turin Lingard a lut daih thin. Hemi avang hian man marking-ah Spurs tlarhnung an buai leh zauh thin a, Rashford-a'n goal a khung phah kan ti thei bawk awm e.

A tir atangin team hnihte an innawr na hle a, goal-ah an hlauhawm dun em avangin first half chawhnu lamah erawh an inveng tawn dun hle. Young leh Shaw te chuan attacking puih tum viau mahse Spurs hmatawng an tlan chak a, hmun thawl an hmu leh zauh thin, first half chhungin Shaw-a line atangin goal a lut teuh thin hle nghe nghe. A tir lama an nawr vak bak United hian counter attack hmangin an chhu zui vak ta lova, goal an khung hnu second half-ah phei kha chuan Spurs nawr a nat em avangin loh theih lohvin an goal an venghim ta a ni.

Lloris kha a chhuah ho em?

Inkhelh chhung zawngin Spurs goalkeeper Lloris a khel tha, a save nual bawk. First half tawp dawna Rashford pet erawh a dang zo lo, Lloris khan a chhuah ho viau em? Chhuah ho viau lem love, Pogba ball vawrh a that em avangin goalkeeper-in a position turah a duhthusamin a awm hman lo a ni mai zawk. Mual veilam sir atangin Pogba chuan Rashford-a tan mual dinglam sirah ball tha lutuk a vawrh lut.

Lloris chuan khatia United-in an rawn counter thut chu angle khar tumin veilam zawngin a tawlh. Kha thil thleng kha a rang ve bawk em a, a duhthusamin far post lam a lo khar tha tawk lo a ni ber mai. Lloris dem tur a ni lova, second half-ah Pogba vawi hnih tha zet zetin a dang nghe nghe a nih kha. A khel tha, a goal chhuah erawh Pogba ball pet dik vang leh fin vang a ni ber mai.

Moussa Sissoko inhliam Spurs-in an tuar

A dikna chen a awm tlat, United counter attack tharum taka lo dang tura dah Sissoko chu inhliam avangin 43 mins-ah lakchhuah a ni a, hemi hnu chiah hian Rashford-a'n goal a khung ta a nih kha. Lamela a rawn lut a, Spurs midfield an la inrem fel hman lo pawh kan ti thei awm e.

De Gea nge United defender te chetha?

First half-ah shot on target pawh an neih loh laiin second half-ah erawh Tottenham chuan United goal-ah an chhu zawt zawt. Match khat chhungin De Gea chuan save vawi 11 lai a nei, he match khat kan tih hi second half-a a save vek a ni nghe nghe. Kumin Premier league-ah chuan match khata save nei hnem ber a nih phah bawk.

De Gea-a save ho kha a zawna kal deuh vek a ni em? Ni vek bik love. Inkhelh zawhah Solskjaer chuan, "Vawi 11 lai a save, a tam zawk kha chu a save tur ve reng an ni hlawm a, chutih laiin vawi thum emaw vel kha chu a save ropui khawp mai," tiin a sawi. Solskjaer-a sawi hi a dik khawp, thenkhat kha chu goalkeeper dangte pawhina an save tur ve reng a ni hlawm chiang, save vawi 11 lai a neih chhan erawh a positioning dik vang a ni a. A tan save a awlsam phah kan ti thei bawk em e. Tin, Lloris-a chhuah pawh kha De Gea chu nise a save ngei a rinawm bawk.

De Gea kan fak hluai a, man of the match hial a ni. A phu khawp mai, chutih laiin goalkeeper tha an sawi apiangin tute nge a hmaah defender ding tih han ngaihtuah ila, defender tha an lo ni tlangpui ziah. Mourinho-a hnuaiah United tlarhnungin sawisel an hlawh thin, Solskjaer-a'n a enkawl hnu pawhin an tha thar hluai em em chuang lo. Spurs an hmachhawn tum erawh kha chuan United tlarhnungte an khel tha hle.

Defender ten angle an lo khar tha a, Spurs hmatawng ten goal zawna an pet theihna chhunah De Gea-a tan save nuam tawk a lo ni zel a. De Gea a chetthat rualin United defender te tun season-ah chuan Spurs laka an chet dan kha chu an fakawm thlawt a ni.

United game-ah danglamna kan hmu

Solskjaer-a'n United a enkawl atangin an attacking game a danglam nghal hle. Inkhelh zawhah De Gea chuan, "Hei hi Manchester United game khelh dan dik tak chu a ni," tiin a sawi a nih kha. Mourinho-a hnuaiah khan an attacking a na tawk lo, midfielder-in ball an chanin an keng rei a, Solskjaer-a hnuaiah erawh tuman ball an keng rei lo. Vawi hnih thum an khawih hnuah an pass zung zung a, game tempo rang tak hmangin attacking game an khel. Hei vang hian United chuan chance tam tak an insiam theih phah a, goal pawh an khung hnem phah bawk.

Copyright © inkhel.com 2024. All rights reserved.