Premier League club Tottenham chuan January thla-a thlasik bazar a inhawn hunah Brentford striker Ivan Toney chu dawr an tum anga sawi ni viau mah se, North London club hian Barcelona winger Raphinha an dawr zawk dawn niin Football Transfers chuan a tarlang.

Toney hi FA in May thla khan inkhel thei lo turin an hrem a, a hremna hi nakkum January thla laihawlah a tawp dawn a, thlasik bazar inhawn lai a ni dawn bawk nen, Premier League club eng emaw zatin dawr an tum nia sawi a ni.

Chelsea, Newcastle United leh Arsenal te bakah Tottenham pawh Toney nena sawi zawm an ni a, mahse Tottenham erawh an inhnukdawk dawn niin a lang a, Raphinha lam an hawi zawk dawn niin chanchinbu mite chuan an ziak.

Barcelona hian an winger Raphinha hi a man phu tawka dawrtu an awm chuan an hralh phal tih tarlan a ni a, mahse a man an chhiar tlawm dawn lo tih a chiang a, Brazilian winger manah hian euro maktaduai 70 tal an duh nia tarlan a ni.

Barcelona hian Raphinha hi Tottenham defender Cristian Romero nena inthleng an phal niin Football Transfers chuan a ziak a, mahse Tottenham hian Romero hi an chhuah phal a rinawm loh avangin, euro maktaduai 70 sen an inhuam a ngai dawn niin a lang a ni.