Tottenham chuan mipui 62,062 lenna stadium an sak chu an zo fel ta a, season hnih dawn Wembley Stadium an hman hawh hnuah an stadium tharah an insawn ve thei ta.

Tottenham hian Sunday liamta khan an stadium thar hi an hawnga, mi 30,000 hmaah Tottenham U18 leh Southampton U18-te an inhmachhawna, Spurs U18 te hi 3-1 in an chak. Stadium thara goal hung hmasa ber tu hi kum 17 mi Spurs player J’Neil Lloyd-Bennett a ni.

He inkhelah hian half time laiin Tottenham manager Mauricio Pochettino chuan thu sawina hun tawite hmangin Tottenham chuan football khawvelah stadium an neih that ber thu a sawi. Poche chuan, “Kan phur tlang em em a, hetiang chiah hian White Hart Lane kan chhuahsan ni khan ka awm tawh bawk.

Kan stadium hmasa zawk kan chhuahsan ni khan kan tap a, a thar kan neih pawhin lung a chhia a, kan tap lo thei lo. Team-ah nghawng lian tak a nei dawn a, supporter-te lam pawh an phur hle ang. Kan in thar a ni a, kan in tharah kan siam dawn mek bawka, a phurawm em em a ni.

“Whte Hart Lane pawh kha stadium tha tak a ni a, tuna a thar erawh khawvelah a tha ber. He club hian hmalam hun eng tak a nei dawn tih hi ka ring nghet tlat a ni,” a ti.

Tottenham senior team chuan thlaleh April ni 4-ah hian a vawikhat nan an in thar hi an hmang ve dawn a, Premier League inkhelah Crystal Palace an lo mikhual dawn a ni.