Vawiin tlai (20/4/19) hian Premier League inkhel pawimawh em em kan hmu dawn a, champion tum mek Manchester City chuan Etihad Stadium-ah Tottenham chu kan sana tlai dar ngaah an lo mikhual dawn a, inkhel hi referee Michael Oliver chuan a vil ang.
Team hnihte hi Champions League quarter-final ah an inhmachhawn zo chiah a, aggregate-ah an goal thun zat inangin Tottenham hi away goal rule hmangin an tlanga semi-final an lut. Champions League lama an intum zawh chiah bawk avangin tun hnaiah an intum zing dawn angreng hle a, tun kar laihawla an intum zawh hnu lawkah vawiin tlai hian an intum leh nghal dawn a, an khelhna hmun tur pawh a inang chiah a ni.
City hi tunah hian hmahruaitu Liverpool aiin khelh khatin an khel tlem zawk a, pahnihnaah awmin khelh 33-ah point 83 an hlawhchhuak tawh. Liverpool chu City hian point hnih chiahin an pha lova, Tottenham hi an hneh a nih chuan khelh inang chiahah City hi point kha sangin hma an hruai dawn.
Tottenham hi City hnuai chiahah an awm mek a, anni hian khelh 33-ah point 67 hlawhchhuak tawhin pathumnaah an awm. Tottenham hian Liverpool leh City-te chu tibuai pha tawh lo mahse an hnuaia awm pathumte nen an inkar a zim em avangin chak loh a thiang lova, vawi khat chak loh avangin season tharah Champions League an khel pha lo thut thei.
Team hnihte tan hetiang taka a pawimawh avangin leh Champions League lama lo in paihthla zo chiah an ni bawk nen inkhel a hmuhnawm dawn chianga, Tottenham hian Champions League lama City kawng zawh lai an tihtawp sak ang chiahin Premier League lama an beiseina pawh tihtawp sak an tum dawn. City erawhin phuba lak ngei an duh dawn a, Premier League lamah inhneh tir an tum lo hle ang.
Team news:
Manchester City tan khel thei lo tur chiang sa hi an second goalkeeper Claudio Bravo chiah a ni a, Zinchenko chu a khel thei dawn em a la hriat loh.
Tottenham hian inhliam an nei nual a, Harry Winks, Aurier, Janssen, Harry Kane, Erik Lamela leh Moussa Sissoko-te chuan City hi an hmachhawn thei dawn lo veka, Eric Dier chu a khel thei dawn em a la chiang lo bawk.
Predicted lline-up:
Manchester City- Ederson, Walker, Stones, Otamendi, Mandy, Fernandinho, De Bruyne, Bernardo Silva, Sane, Sterling, Aguero.
Tottenham- Lloris, Trippier, Vertonghen, Alderweireld, Rose, Wanyama, Dier, Alli, Eriksen, Son, Llorente.