Tottenham Hotspur chuan Christian Eriksen chu chelh zui zel an tum a, a hmaa a hlawh thin let vela thlem an tum.

Christian Eriksen chuan a contract neih laiah kum khat chauh a nei tawh a, hei vang hian Spurs chuan contract thar zawrh an tum mek a. Tun hnaiah Real Madrid leh Barcelona te chuan Denmark attacking midfielder hi an hmutai hle niin thawm a awm a, Atletico Madrid pawhin James Rodriguez an lak theih loh chuan Eriksen hi lak an tum nia sawi a awm mek bawk a ni.

Spurs hian Eriksen hi contract thar ziahpui an lo tum tawh a, an la inrem thei rih lo zel a. Tuna a contract neih laiah hian Eriksen chuan kar khatah £80,000 vel bawr a hlawh mek a. Contract thar ziahpui tura an ruahmanah hian Tottenham chuan Eriksen-a hlawh hi an phal hnem tawh viau a, a hmaa a hlawh let £160,000 vel bawr tawktarh an tum niin an sawi.

Club lamin Eriksen hi contract thar ziahpui tumin hma lak dan ngaihtuah mahse Danish midfielder aiawhte chuan contract thar an ziah dawn pawhi pawisa vang chu a nih dawn loh thu an sawi a ni.

London khaw club Tottenham hian Christian Eriksen hi contract an ziahpui vat loh chuan nakin lawkah free transfer in a chhuak thei daih dawn a. Chuti a nih loh vek pawhin tuna transfer window inhawng mekah club thenkhatin an rawn thlem chhuak ve thei bawk a ni.

Singapore lamah Tottenham hian tour an nei mek a, an manager Mauricio Pochettino chuan season liam taa UEFA Champions League-ah Tottenham kha lo champion ta se, Spurs chu a chhuahsan a rin thu a sawi.

“Champions League title kha lo la ta ila, club chhuahsan a hun chiah tiin rilru ka siam ka ring a. Ka chhuahsan hnuah coaching staff thar kaihhruaina hnuaiah bung thar kai tumin hma la se a fuhin ka ring a. Amaherawhchu, final kan khelh zawh hnuah khan a tawk tein thil chu a thleng niin ka hre leh ta a ni,” a ti.