Spurs, Cavaliers leh Bucks an chak

24th April 2018, 01:04AM

Manu Ginobili chuan point 16 a score a, heng zinga point 10 hi 4th quarter-ah thunin San Antonio Spurs chu Golden State Warriors lakah a chakpui.

Pathiannia inkhelah hian Spurs coach Gregg Popovich chu a nupui thihna avangin a la inlan thei chuang lo a, Spurs tan hian LaMarcus Aldridge chuan point 22 thunin rebound 10 a la a. Kum 40-a upa Ginobili hian 4th quarter bikah point 10 thunin Spurs chu 103-90 in an chak a. Ginobili hian season tawp hunah NBA ah season 17 a hman dawn leh dawn loh a tih chian tur thu a sawi.

Kevin Durant chuan point 34 thunin rebound 13 a la a, play-off series an khelh mekah Warriors chu a vawi khatna atan a tlawm zawkah an tang ta tho a. Thawhlehni hian Game 5 an khel dawn a, Durant te hi an chak chuan series-ah hian an chak chiang tawh dawn a ni.

Coach Popovich chu Nilaini khan a nupui Erin chuan a thihsan a, hei vang hian a zawnin game hnih chu a tel thei ta lo a. Lead assistant Ettore Messina chuan Spurs hi a kaihruai a, a hmaa an game nen chuan an khelh dan pawh a inang lo hle.

LeBron James chuan point 32 a thun a, Cleveland Cavaliers chu chakpuiin Indiana Pacers nen an chak zat a inang ta chiah a. James hian rebound 13 leh assist 7 a nei bawk a, play-off game-ah point 30 aia tam vawi 100 a thun tlinna chiah a ni.

Kyle Korver chuan 3-pointer vawi 4 thunin a pumpuiah point 18 a score a. Indiana tan Domantas Sabonis chuan point 19 a score a, Myles Turner leh Victor Oladipo te pawhin point 17 ve ve an thun bawk.

Milwaukee Bucks leh Boston Celtics inkhelah Bucks chu hun tawp dawn retah an chak hram a, anni hi an chak zat a inang ta chiah a ni.

Giannis Antetokounmpo chuan second 5 chauh a la awm tihin a score a, Bucks chu 104-102 in an chak hram a. Marcus Morris chuan buzzer rik rualin feet 14 atangin score a tum a, a lut ta lo hlauh a, lut se chuan Celtics hi an chak thei dawn a ni.

John Wall zarah Washington Wizards chuan rin kai zawk Toronto Raptors chu 106-98 in an hneh a, Eastern Conference an khelh mekah 2-2 in an la inhnehtawk theih phah.

Bradley Beal chu a foul out a, Wall hian Washington point hnuhnung 14 zinga point 10 hi a thun a, a pumpuiah point 27 a score a, assist 14 ngawt a nei bawk a ni.

Copyright © inkhel.com 2024. All rights reserved.