January ni 5, 2019 (Inrinni) khan Sports Minister Pu Robert Romawia Royte chuan Muallungthu-a Multi Sports Centre a tlawh a, Centre of Excellence dinna tlak a nih dawn leh dawn loh a enfiah.
Sports Minister chuan Ministry of Tribal Affairs sum hmangin Mizoram-ah Centre of Excellence pahnih din an tum thu a sawi a, sports lama Zofate thangchhuahna pahnih - Football leh Boxing-ahte Centre of Excellence sawrkarin siam a tum thu sawiin Mizoram chhim lam hmun remchangah boxing tan Centre of Excellence din a ni ang a ti.
Pu C.Laltlanthanga, Secretary, Mizoram State Sports Council kaihhruaina inkawmhona neihah Sports Minister Pu Robert Romawia Royte chuan, " Mizo infiammi hlawhtling pahnih, Asian Games 2018 Womens Hockey leh Youth Olympic Games 2018-a India pahnihna nihpuitu, Lalremsiami leh Youth Olympics Games 2018-a gold medal latu, ritchawichak Jeremy Lalrinnunga te hnenah vawiin thlengin Incentive Cash Award pek an la ni lova, a rang thei ang berin sawrkarin kan pe ang" a ti a.
Sports Minister chuan, " Centre of Excellenc tur Mizoramah pahnih(Football & Boxing) kan siam dawn a, chumi tur chu kan en thlithlai mek. Football-ah International match khelhna tlak sawrkarin siam ngei kan tum a, hmalakna kalpui tan mek a ni. India champion kan ni thei a, kan player te hian international standard a khelh an phu a ni" a ti.
Tourism leh Sports te tha taka kalkawp thei a nih thu sawiin, " Theihtawp chhuaha hmalak chhoh tum a ni a, a bikin sports-tourism lamah ngaihtuahna thar kan sen a ngai dawn. Sports leh Tourism hi a kalkawp thei a, sports Industry dinin Tourism lamah Industry kan din thei bawk. Sports hi kan ram economy siam tha theitu a la ni hial dawn a, India leh khawvelin Mizote min hriatna awmchhun chu sports a ni" tiin hmalakna zau tak kalpui an tumna kawngah sawrkar official, party worker leh sports Association zawng zawngte thawhpuiah a sawm bawk. Sports Minister hi Pu Lalrinsanga Ralte, MLA bakah Official thahnem takin an tawiawm a ni.
Mualti Sports Centre, Muallungthu hi NEC sum Rs.377 lakh hmanga Mizoram State Sports Council-in a siam a ni a, Football Ground puitling a awm a, mi 100 vel riah theihna a ni. Kum thum chhung siamin kum 2018 kum tir lamah zawhfel a ni a, Residential Coaching camp atan hman reng tawh a ni.