13 Nov 2020 08:39

inkhel

Sports Minister in MFA Khelmual a tlawh

Sports Minister Pu Robert Romawia Royte chuan November ni 13, 2020 khan Sairang Dinthar veng a MFA khelmual a tlawh a, FIFA malsawmna dawng thei khawpa MFA te thawhrimna chu fakawm a tih thu leh an hlawhtlinna chu a lawmpui thu a sawi.

Sports Minister chuan football chu Mizoram a industry lian ber a nih thu sawiin kum khatah kan player ten vaibelchhe tel an hlawh chhuak thei a, hetiang hi Mizoram a industry dang sawi tur a vang, a ti.

India rama football league sang ber ISL a khel Mizo tlangval 33 zet an awm dawn thu sawiin I League player pawh thahnem tak an awm leh dawn tih a sawi.

Sports minister Pu Robert Romawia Royte chuan Mizoram hmun hrang hranga football khelmual phullem phah mek leh sports zirna hmunpui buatsaih chhoh zel turte a sawi lang bawk.

MFA hruaitute chuan khelmual kianga tribal girls hostel din a nih theih nana Minister puihna leh finchhuahna chu lawmawm an tih thu an sawi a. Sports minister a nih hma atang tawha insengso zawka Zoram infiamna atana a tha thawh zozai te chu fakawm an tihzia an sawi lang bawk.

Sports Minister hi Er Lalzirliana, MLA leh sorkar official-ten an ṭawiawm a ni.

(adsbygoogle = window.adsbygoogle || []).push({});