Mizoram State Sports Council General Body Meeting chu vawiin (Thawhlehni) chawhma dar 11:00 khan Sports Minister leh MSSC President ni bawk Robert Romawia Royte hovin Secretariat Conference Hall, New Capital Complex-ah neih a ni a, General Body Meeting hian kum 2020-2021 chhunga MSSC sum hman tur - thawktute hlawh, Sports Association leh thil hrang hranga hman tur avaiin Rs.1464.89 lakh pawmin heng zinga Rs.2,05,00,000/- (cheng nuai 205) chu Sports Association hrang hrangten Promotion Fund-a hman tur a ni.

Sports Minister Robert Romawia Royte kaihhruaina hnuaia neih Mizoram State Sports Council-ah hian State Level Sports Association tin aiawh pakhat theuh leh Govt.Official te nen an vaiin mi 42 an tel a, General Body Meeting-ah hian tun hnaia boral an member Francis Paul sunna hun an hmang bawk.

GB chuan Fit Mizoram Movement kalpui mekah ram pum huapa Online hmanga skipping rope hmanga intihsiak buatsaih te, Mizoram State Sports Council building sa tura hmalak te, sawrkarin Mizoram District hrang hranga Sports Office nei tura hma a lak mek chak zawka kalpui a nih theih nan leh a hlawhtlin theih nan hmalakte an rel.

Sports Minister chuan Covid 19-in nasa takin sports a tithuanawp a, inkharkhipna leh kaihhruain avangin player te fitness pawh a tlahniam hle ang tih a rin theih a, hemi avang hian online hmanga skipping rope hmanga intihsiakna buatsaih a nih tur thu leh hei hi Union Sports Minister hmaah pawh a sawi tawh thu a puang a. Covid 19 hi Sports Department leh Association te chu a tuar nasa ber an ni a, eng ang chiahin nge infiammite hian an tawrh tih hriat theih ni lo mahse engmah hmalakna a kalpui theih lohin an chawl tawp a ni a ti.

Mizorama sports hmasawnna tur ruhrel din chhoh mekah Externally Aided Projects (EAP) kaltlangin infrustructure lama hmasawnna tur engemawzat ruahman mek a ni a, hmalakna chi hrang hrang Sports Minister chuan sawiin Mizoramah Sports School engemawzat dinna tur Rs.16000 lakh hmuh a ni tawh a, Khelo India hnuaiah Mamit-ah District Sports Complex dinna tur Rs.4400 lakh sum hmuh a ni a ti bawk.

India-in Olympic vision a neih mekah Mizoram chu Khelo State Centre of Excellent a thlan thar pariat zingah a tel thu sawiin Aizawl bakah, Lunglei Zobawk, Lawngtlai, Mamit, Kawrthah leh hmun dangahte centre din a ni ang a ti bawk.

General Body Meeting-ah hian kum kalta 2019-2020 chhunga Sports & Youth Services Department leh Mizoram State Sports Council hmalakna hrang hrangte report ngaihthlak a ni a, MSSC Secretary ni mek C.Laltlanthanga chu a term a lo zawh tak avangin kum thum chhung atana Secretary turin Sports & Youth Services Department-a Jt.Director ni mek John Tanpuia, MCS chu ruat a nih thu Sports Minister chuan a puang bawk a ni.