28 Jul 2020 05:08

inkhel

Sport Minister-in Hockey Turf phahna tur lung a phum

July ni 28, 2020 hian Pu Robert Romawia Royte, Sports & Youth Services Minister-in Muallungthu Hockey Phullem phahna tur lung a phum.

He Lungphum inkhawmah hian Pu H.Lalengmawia IAS, Seretary, SYS-in kaihruaiin, Pu T.C. Pachhunga, Vice Chairman, S,YS&TD Board, Prof. F.Lalnunmawia, MLA Aizawl South-III leh Pu C.Lalrosanga, MP (Lok Sabha) te bakah official pawimawh dangte an tel a ni.

Sport Minister Pu Robert Romawia Royte chuan Muallungthu khua chu Lok Sabha MP Pu C.Lalrosanga'n Model Village-a a puan avangin a lawmpui tak zet tih sawiin khaw dangte entawn tlaka siam sorkarin a tum tih a sawi a, New Education Policy siam mek ani a, sports leh physical exercise chu co-curricular activity (zirna peng khat) ni tawh lovin curricular (zirna pangngai) a ni tawh ang a ti.

Sports Department chuan Covid-19 avanga infiam theih loh lai hmang tangkaia MSSC-in field leh infiamna hmun tam tak repair-a siamthar hna a thawk chu a remhriatthlak hle a ni a ti.

Sports Minister chuan Hockey chu tunhma atanga Mizote thiam chi niin tunah pawh Nl. Lalremsiami leh Hockey thiam dangte avangin Mizote chu khawvel hriatah pholan mek kan ni a, FIH Rising Star of the Year Chawimawina Remsiami'n a dawng chu Mizo hnam ang pawha chhuan tham a ni a ti.

Mizoram Sorkar leh mipuiin Covid-19 avangin sum kan mamawh a, Mizoram budget ei hek lova Sports & Youth Services Department-in hmasawnna rahbi a tuk chho mek hi a lawmawm a, Officer leh staff te an fakawm hle a ni a ti. Zirna, thiamthil (skill development) leh Sports-a hmasawnna tluantling a thlen theih nan sports school tha kan mamawh tih hriain Mizoram hmun 5-ah Residential Sports School 5 dinna turin ruahmanna siam a ni a, vanneihthlak takin Central Sorkarin Rs 16751.70 lakh lai min sanction a, 50% chu Sports Department-ah allocate tawh a ni a ti a. Heng Academy-ah hian Zirna tha dawng chungin zirlaite'n sports an zir tak tak dawn a ni a ti.

Tourism Minister ni bawk Pu Robert Romawia Royte chuan tunhnaia Zokhawthar Tourist Lodge tlawhtu Congress Party MLA pakhatin Media kaltlangin Zokhawthar Tourist Lodge lirnghingin a tihchhiat ngaihsak lo angin min puh a, Zokhawthar Tourist Lodge hi Sorkarin a ngaihsaka, lirnghingin a sawi ni la lain endik tan nghal a ni a, Lirnghin ni atanga ni 30-na vela lehlanga han tlawh vetu Congress MLA ten Zokhawthar an han thlen chhoh ve kha chuan Zokhawthar Tourist Lodge Repair dan tur tihfel diam a ni tawh zawk a ni a ti. Minister chuan a taka ka han hmuh ve ngei Lirnghin nasatna khuate kha Congress MLA te khan an tlawh ve miah lova, Champhai atanga baklenga an tlan let leh ta daih kha lirnghin nasatna khuaa anmahni party Congress hruaitute ngei pawhin mak an ti hle a ni a ti.

Pu C.Lalrosanga, Member of Parliament(Lok Sabha) pawhin thu sawiin, Model Village atana amah ngeiin a thlan khuaah model an nih tawhna sa nemnghet tura Aizawl District-a a hmasa ber ni tura Muallungthu khuain Synthetic Hockey Turf an phah thei tur chu a lawmpui thu a sawi a. Mizoram State Sports Council Complex tihchangtlunna tur leh Muallungthu khawtlang hmasawnna tura theihtawpa hmalatu Bialtu MLA Prof. F. Lalnunmawia leh Sports Minister Pu Robert Romawia Royte chungah lawmthu ka sawi takmeuh a. Muallungthu khawtlang pawh model village atana thlan in nih anga model hlawhtling in nih ka duhsak che u. Village Development Plan kan neihte pawh Central lamah thlen tawh niin a hlawhtlin theih nan theihtawp ka chhuah zui ang, a ti.

He hunah hian Aizawl South III Bialtu MLA, Prof. F.Lalnunmawia pawhin, "Aizawl District-a hmasa ber tur, Synthetic Hockey Turf siamna tur lungphum phum a ni ta hi ka lawm takzet a. Hockey Turf phah a nih theih nana theihtawpa chaka hma latu Sports Minister Pu Robert Romawia Royte leh a thawhpuite chungah pawh bial leh Muallungthu khawtlang aiawhin lawmthu ka sawi a ni," a ti. Tin, COVID-19 hrileng avanga engmah ti lova ṭhut tlawk tlawk hi sorkar chuan a tum lova. Development hna thawk thei lo leh kan thawh loh pawh pawi ti lova min beitute awm mah se, kan Chief Minister zahawm tak Pu Zoramthanga kaihhruai sorkar hian ram hmasawnna turin chawl lovin hna kan thawk zel dawn a ni, a ti.

Nl. Lalremsiami, FIH Rising Star of the Year, Special Guest pawhin thusawiin, Aizawl hnaivai taka Sport Minister hmalaknaa Hockey phullem phah ground tha tak awm tura avanga a lawmthu leh thalaite chhawr tangkai theuh turin a sawm a ni.

Pu C.Laltlanthanga, Secretary, MSSC-in technical report pein, he Hockey Ground hi Khelo India Scheme atanga sum hmuh Rs 550 lakh hmanga siam a ni a, state share ngai lovin 100% Central sorkar tum vek a ni a ti a. Standard size, a dung 91 metres leh a vang 55 metres-a siam tur niin, Fencing, RCC Water Tanky, Water Sprinkler System leh Electric Water Pump te dah nghal vek tur a ni a. RCC Pavilion mi 100 leng, Changing room pahnih leh toilet pahnih siam tel tur a nih thu tar lan a ni.

(adsbygoogle = window.adsbygoogle || []).push({});