Combat sports ngaitu ten kan nghahhleh em em Usyk vs Joshua rematch chu Sunday zingkar khan kan hmu a, champion lai Oleksandr Usyk chuan Saudi Arabia-ah Anthony Joshua chu split decision hmangin a hneh.
Usyk hian a WBA, WBO, IBO leh IBF heavyweight title te humhimin unified heavyweight champion a ni chhunzawm a, Ukrainian boxer hian Ring Magazine heavyweight title a hlawhchhuak tel bawk a, cruiserweight undisputed champion hlui hi cruiserweight leh heavweight-a Ring Magazine title kawl ve ve thei awmchhun a ni.
Boxing match hmuhnawm tak, technical em em kan hmu a, mahse champion lai Usyk chuan Joshua aia boxer tha zawk a nihzia a lan nawn tir a, judge pathum zinga pakhatin 115-113 a Joshua a chak tir laiin, judge dang pahnihin 115-113, 116-112 in Usyk hi an chak tir ve thung.
Nikum September thla ni 25 khan, London-a Tottenham Hotspur Stadium-ah Usyk leh Joshua te hi an lo hmachhawn tawh a, hemi tum hian upset ropui thlengin Usyk hian unanimous decision-a hnehna changin, Joshua-a heavyweight title kawl lai pali WBA, IBF, WBO leh IBO title te a chhuhsak.
Joshua hian a title hloh te lak kir leh ngei tumin, rematch clause a neih a hmang tangkai a, mahse a vawihnih nan hnehna chang zo ta lovin, Usyk erawh hian a professional career-ah chak loh emaw draw emaw a la nei lo tluang zel a ni.
Rematch-ah hian Joshua hian bul a tan tha zawk tih theih a ni a, a tir round hnihah Joshua hi a chungnung hret ti ila kan sawisual a rinawm loh. Joshua hian body shot a hmang tangkai hle a, hei hi Usyk-a tana harsatna thlentu ber ni pawhin a lang. Usyk a insiamrem har lova, round hnihna hnu hi chuan round sarihna thleng a chungnung ve leh hret zawk tih theih a ni a, boxer pahnih te hi an inhnehtawk hle.
Round 9-naah Joshua a che tha hle a, a body shot pek chhuah rah tih a hriat a, palian zawk a nihna leh hnek na zawk a nihna rawn lang mahse Usyk pawh a duai lova, Joshua hian a knock-down thei bik lo. Round 9-na hi Joshua tan 10-8 round ni chiang mah se, round 10-naah Usyk-a’n a rawn chhanglet ve leh nghal a, round 10-na hi Usyk-a tan 10-8 round a ni ve leh chiang hle.
Round 11-naah pawh Usyk che tha leh viau mah se, Joshua hian chiang takin a hnek fuh ve leh a, Usyk a talbuai teuh hle a, mahse a in recover har lovin, he round pawhin Usyk-a ta bawk tih theih a ni leh. Round 12-naah pawh Usyk a chungnung zawk a, a tu zawk mah in knock-down lovin round 12 an khel zova, a phu zawk Usyk-a'n he fight-ah hian hnehna a chang ta a ni.