28 Oct 2020 01:25

inkhel

Speed Kicking-ah Ruthi Lalneihhlui’n Gold a pet chhuak

Ni 23-25, October 2020 chhunga Phillipine Taekwondo Association buatsaih 2020 Smart/MVP Sports Foundation Global Taekwondo Online Speed kicking Championship-ah Leitlangpui nula Ruthi Lalneihhlui chuan India tan Gold medal a pet chhuak ta a ni. 

Ruthi hian Senior Female Feather Weight ah khelin a elpui ram dangte te lakah pet rang ber ani ta a ni. India dinhmun chawikangtu Gold medalist 19 zingah Vanlalmawipuia nen telin A pumpuiah India team chu pahnihna an nih pui.

Ruthi Lalneihhlui hi Pu C. Rothanga leh Pi Lalrinchhani te fanu niin Lunglei Venghlunah an cheng mek a ni. Kum 2009 khan Lunglei District Taekwondo Association hnuaiah Taekwondo a zir tan a. Kum 2013 khan Aizawl SAI ah lutin Mizoram ti hmingthatu zinga mi a ni thuai a. State level-ah Gold 20, Silver 6 leh Bronze 4 ngawt a pet chhuak tawh a. Mizoram tan National Championship ah Bronze 3 a hlawhchhuak tawh bawk.

Infiamna dang LDFA Football Tournament best player leh District fitness Challenge Gold medalist niin talent a nei tha hle. Tin, Taekwondo Fight League 2 ah khan hmeichhe player tha thlanchhuah 4 zingah a tel pha hial bawk a ni.

Tunlai hrileng avangin International Taekwondo Tournament pangngai zawng zawng chu buatsaih thei lovin sawn hlat vek ani a. World Taekwondo Headquarters chuan hemi hun chhung hian infiammite hamthat nan ralkhat inelna hi chawisan a duh a, Online Speed Kicking leh Online Poomsae te hi a pawmpui tawh ani.