​Spanish GP-ah Max-a'n F1 history a siam

16th May 2016, 04:05AM

Tlar hma atanga tlan chhuak Mercedes driver pahnih Hamilton leh Rosberg-te chu an insut avangin an tlanchhuak ve thei ta lova. Red Bull driver naupang kum 18 mi Max Verstappen-a tan hun duhawm a inhawng ta a, Spanish GP-ah pakhatna niin Formula One history a siam ta nual a ni.

Red Bull chuan Daniil Kvyat chu an B-Team Toro Rosso-ah an pet chhuak a, a aiah Toro Rosso driver Max hi an lalut nghal a, Red Bull tan intlansiak vawi khat a hmachhawnnaah pakhatna a ni ta nghal a ni. Max hi F1 history-a intlansiak hmahruaitu naupang ber a ni a, point hlawhchhuak thei naupang ber, podium-a ding thei naupang ber leh pakhatna ni thei naupang ber a ni ta a ni.

He intlansiakah hian lap khatna lekah a pole atanga bul tan Hamilton leh pahnihna atanga bul tan Rosberg te chu an insu a, an pahnih hi an chawl chhunzawm ta a ni. Kimi Raikkonen chu pahnihna niin, Ferrari driver tho Sebastian Vettel chu pathumna a ni a, he intlansiaka pakhatna Max hian chanchin thar a luah laiin Mercedes driver pahnih insute chuan chanchin a luah lian zawk mah a.

Season bul tan tha tak Nico Rosberg hian Championship-ah hma a hruai mek a, hetih lai hian Hamilton erawh engine lama harsatna a neih thin avangin season bul a tan tha lo hle. Spanish GP-ah Hamilton chuan pole a chang a, intlansiak tan a nihin Rosberg chuan Hamilton hi a pel nghal mai a.

Turn thumna an thlen dawnin Hamilton chuan Rosberg pelh a tum chu veilam leh dinglam atangin a veh tawn, Rosberg chuan inpelh tir a lo tum der si lova, Hamilton chu phulah a tawlh chhuak ta, Hamilton chuan a car a thunun zo ta lova, turn 3-a Rosberg kual tur chu Hamilton hian a hnawl chhuak chhunzawm a, an pahnih chuan a chawl ve ve ta a ni.

Rosberg a thinur hle a, he chetsualna a thlen hnu hian Mercedes Team hotute leh driver pahnihte hian meeting an nei nghal a ni. Niki Lauda chuan Hamilton tlan dan chu sawiselin, na taka Rosberg nawra pelh a tum kha hun lo a ti hle.

Mercedes non-executive chairman Niki Lauda chuan, " Thil tul lo tak a ni, pawm zam chi a ni lo bawk. Lewis khan a ti mah mah a ni. Tin, pelh a tum hun pawh kha a hun lo hle bawk, engvangin nge Nico khan a inpelh tir kher ang? Lewis khan a chhutsual hle mai, a chet dan kha ka dem a, team tan pawh pawm zam chi a ni lo," tiin an chetsual hlimah a sawi.

Hetih lai hian Mercedes F1 boss Toto Wolff erawh chuan tunge thiamlo zawk tih sawi fiah a har thu leh thiam loh han chantir zawk tur a hriat loh thu a lo sawi ve bawk. Driver pahnihte chuan point an hlawhchhuak lo ve ve a, season bul tan tha tak Nico chuan point 43 in Hamilton lakah hma a la hruai chhunzawm zel a ni.

Pakhatna Max chuan Red Bull-a a debut race-a pakhatna a ni chu mak a tih thu a sawi rualin a pain nasa taka a puih thin thu a sawi chhuak bawk a ni. Max Verstappen-a pa Jos drove hi F1 driver lo ni tawh thin a ni a, 1990 khan Benetton khalhin, a thlen san berah pathumna a ni.

Pictures Credit : Getty, Reuters & F1

Copyright © inkhel.com 2024. All rights reserved.