Spanish GP-ah Lewis Hamilton an um pha lo

13th May 2019, 02:05AM

Pathiannia Formula One Spanish Grand Prix-ah Mercedes chuan an chungnunzia an lantir leh tawh a, an driver pahnihte chu pakhatna leh pahnihna an ni leh tawh a, Lewis Hamilton chu pakhatna niin, Valtteri Bottas chu pahnihna a ni.

Ferrari chuan tactic an hman fuh loh an tuar a, podium-ah an lawn ve thei ta lo a. Red Bull driver Max Verstappen chu pathumna niin, Ferrari driver pahnih Sebastian Vettel leh Charles Leclerc te chu palina leh pangana an ni.

An tlan tan deuh chiah a, Lewis Hamilton chuan kawi hmasa ber atangin hma a hruai nghal a. Sebastian Vettel chuan bul a tan fuh hle a, a hmasa berah a awm nghal a, mahse a kual zau mah mah avangin Hamilton leh Valtteri Bottas te chuan an rawn lehpel nghal a. Max Verstappen pawhin remchangah lain Vettel chu a rawn lehpel ve bawk a ni.

A tira a chet fuh loh nghal hnuah hian Vettel chuan a hmaa tlan pathumte chu a um pha leh thei tawh lo a, a team-mate Charles Leclerc lah chu team lamin Vettel lehpel lo tura an tih avangin a hnung zawkah a tlan ta ngar ngar a ni.

Lewis Hamilton chu a hma berah a tlan tha hle a, Verstappen chuan pit lamah Vettel a zui lut a, Bottas leh Leclerc te chu pahnihna leh pathumnaah an tlan a. Hmahruaitu Hamilton leh a hnunga tlan pahnihte chu an inthlau chak hle.

Lando Norris leh Lance Stroll te car chu a insi palh a, hei vang hian safety car a chhuah phah a. Hamilton chuan hma a hruai fal hman avangin safety car chhuak chu a lawm vak lo hle a, mahse tlan pangngaia an tlan leh hnuah pawh tu mahin an um hnai thei ta chuang lo a, fastest lap te a siam zui a, point a hmuh belh theih phah nghe nghe a ni.

Pierre Gasly chu parukna niin, Kevin Magnussen chu pasarihna a ni a. An hnungah hian Carlos Sainz, Daniil Kvyat leh Romain Grosjean te chu an awm bawk a ni.

Pakhatna a nih takah chuan Hamilton chuan drivers’ championship-ah hma a hruai leh ta chiah a, a team-mate Valtteri Bottas aiin point 7 in a sang zawk a. Sebastian Vettel chu Hamilton aiin point 49 ngawtin a hniam tawh zawk a, constructors’ championship-ah pawh Mercedes chu Ferrari aiin point 96 ngawtin an sang tawh zawk a ni.

May 26 khian Monaco Grand Prix-ah an inel leh dawn a ni.

Result
1. Lewis Hamilton, Mercedes AMG Petronas Motorsport
2. Valtteri Bottas, Mercedes AMG Petronas Motorsport + 4.074s
3. Max Verstappen, Aston Martin Red Bull Racing Honda + 7.679s
4. Sebastian Vettel, Scuderia Ferrari + 9.167s
5. Charles Leclerc, Scuderia Ferrari + 13.361s
6. Pierre Gasly, Aston Martin Red Bull Racing Honda + 19.576s
7. Kevin Magnussen, Rich Energy Haas F1 Team + 28.159s
8. Carlos Sainz, McLaren F1 Team + 32.342s
9. Daniil Kvyat, Red Bull Toro Rosso Honda + 33.056s
10. Romain Grosjean, Rich Energy Haas F1 Team + 34.641s
11. Alexander Albon, Red Bull Toro Rosso Honda + 35.445s
12. Daniel Ricciardo, Renault F1 Team + 36.758s
13. Nico Hulkenberg, Renault F1 Team + 39.241s
14. Kimi Raikkonen, Alfa Romeo Racing + 41.803s
15. Sergio Perez, SportPesa Racing Point F1 Team + 46.877s
16. Antonio Giovinazzi, Alfa Romeo Racing + 47.691s
17. George Russell, ROKiT Williams Racing + 1 lap
18. Robert Kubica, ROKiT Williams Racing + 1 lap
Ret. Lance Stroll, SportPesa Racing Point F1 Team
Ret. Lando Norris, McLaren F1 Team

Constructor Standings
1. Mercedes AMG Petronas Motorsport - 217
2. Scuderia Ferrari - 121
3. Aston Martin Red Bull Racing - 87
4. McLaren F1 Team - 22
5. SportPesa Racing Point F1 Team - 17
6. Rich Energy Haas F1 Team - 15
7. Alfa Romeo Racing - 13
8. Renault F1 Team - 12
9. Red Bull Toro Rosso Honda - 6
10. ROKiT Williams Racing - 0

Copyright © inkhel.com 2024. All rights reserved.