Indian striker la naupang tak Aryan Gupta chu Spanish 2nd division club AD Alcorcon chuan an lalut.

AD Alcorcón tia hriat lar, Agrupación Deportiva Alcorcón SAD ih Spanish 2nd division club an ni a, season liam taah khan club 22 zingah 18-na an ni a, vawi 13 an chak a, vawi 11 an draw a, vawi 18 chu an chak lo a. Season tawpah point 50 an hmu a, 2016/2017 season ah khan an che tha angreng a, season tawpah 7-naah an awm.

Aryan Gupta hi AD Alcorcon practice naah te pawh a awm ve tan tawh niin an sawi a, tun thla tawp lamah contract an tifel ang a, Indian footballer zingah chuan Spanish League player ni thei palina a ni dawn a. 2014 khan Europe lamah pawh a lo inkhel ve tawh a, Glacier FC tan khawvel ram hrang hranga youth club leh school ho inelna, Sweden rama buatsaih Gothia Cup ah a tel a ni.

Gupta hi kum 19-a upa a ni a, match 7 khelhah goal 4 a thun bakah midang thun tur vawi 1 a siamsak bawk a, hei vang hian AD Alcorcon pawh hian an duh phah a. Indian footballer dang pawh Spanish League-ah hian an lo khel tawh hlawm a, 2016 khan Ishan Pandita chu Leganes-ah a lut a, India Under-17 captain thin Deependra Sindh Negi pawh 2nd division club Reus-ah a khel thin a, Reus chhuahsanin ISL club Kerala Blasters-ah a khel tawh a. Tun hnai khan Luv Kapoor pawh 4th division club Palamos CF ah a lut bawk a ni.

Aryan Gupta chuan, “Spain-ah chuan an game a rang em em mai a, mahni aia player tha zawk bula khelh chu kawng tam taka hmasawnna a ni a. Mi chi hrang hrangte chu ka tan an thain an tangkai em em hlawm a, Spanish football system ka hriatthiam theih phah bakah ka tlangnel phah sawt bawk a ni,” tiin a sawi.

Alcorcon international area manager Jose Antonio Gonzalez chuan ram dang atanga player naupang tak tak an lakluhte chu player tha tak ni thei tura chher an tum thin tih sawiin, khelmuala an thiamna mai bakah football hriatna kawnga hma an sawn lehzual theih dan tur an ngaihtuah thin tih a sawi.