LeBron James chuan Space Jam film chhunzawmna tur siam a ni ngei dawn tih hriat theih turin thlalak a pho chhuak.

Space Jam film chu 1996 kumah khan an tichhuak a, mihring pangngai leh milem tihchet chu he film lar takah hian an inkawp a. Basketball legend Michael Jordan chu film-ah hian changin, Looney Tunes huang chhunga chi hrang hrangte nen an inlan a ni.

Basketball chungchang film Space Jam hi 1993 kuma Michael Jordan-a’n NBA a chawlhsan leh 1995 kuma a kir leh chungchang lantir telna niin thenkhat chuan an sawi a ni.

He film-ah hian Looney Tunes chuan Monstars nen basketball an khelhnaa an chak theih nan Michael Jordan chu an ruai a. Monstars hi Swackhammer (Danny DeVito) hnuaia thawk an ni a, Swackhammer hi intihhlimna hmunpui Moron Mountain neitu sual zet mai niin, Looney Tunes ho chu mi hipna tura a thuhnuaia dah a tum a ni.

September 2018 ah khan Space Jam chhunzawmna siam a nih tur thu hi an sawi tawh a, an siam hunah chuan Lakers legend LeBron James chu chang tura ruahman a ni a. A hmain James hi Amy Schumer film siam, comedy lampang Trainwreck ah pawh a lo inlan tawh a, Space Jam thar turah hian a chang a nih chuan pangngai taka a chan hmasak ber a ni ang.

James chuan tun hnaiah Instagram lamah video a dah thar a, hetah hian lukhum a khum a, a lukhumah chuan Space Jam: A New Legacy tih a inziah a, hei hi an film thar siam tur hming tura an tih ngei niin a ngaih theih.

Space Jam: A New Legacy tih hi Black Panther leh Creed producer Ryan Coolger chuan a produce dawn a, Girls Trip leh Night School tih vel direct tu Malcom D Lee chu director tur a ni ang.

The Hollywood Reporter in an kawmnaah LeBron James chuan a phur tawh zia a sawi chhuak a, “Space Jam film thar tur hi a nghahhlelhawm ka ti tawh a, siam vat vat hi ka chak tawh a. Looney Tunes nen kan inzawm dawn bakah naupangho tan thuchah tha tak puan chhuah theihna a ni dawn a ni,” a ti.

“Ryan hian Black Panther hmangin thuchah tha tak a puang tawh a, Space Jam hmang hian naupanghoin an duh phawt chuan an duhthusam an thlen dik tir thei a ni tih hi an thinlungah tuh kan tum dawn a ni,” a ti bawk.

A hmaa an ruahman dan chuan March thlaa a tul zualpui peih fel hman vek an beisei kha a ni a, July 16, 2021 a Space Jam: A New Legacy hi tlangzarh theih an beisei a ni.