21 Jun 2019 10:42

inkhel

Space Jam 2 ah LeBron James

Basketball chungchang movie lar tak Space Jam chhunzawmna chu an siam leh dawn hnai a, Space Jam 2 ah hian LeBron James chu a chang dawn niin an sawi.

LeBron James chu NBA leh WNBA huang chhunga mi lar tak takte bakah Bugs Bunny te nen Space Jam 2 ah hian an lang hlawm dawn a. Kumin nipui chhung hian he film thar tur hi an siam tan theih an inbeisei a, July 16, 2021 ah tlangzarh theih an rilruk a ni.

Space Jam 2 ah hian James bakah Portland Trailblazers guard Damian Lillard, Golden State Warriors guard Klay Thompson, Houston Rockets guard Chris Paul leh LA Lakers star Anthony Davis te chu an inlan dawn bawk a ni.

WNBA star Diana Taurasi bakah Nneka Ogwumike leh Chiney Ogwumike te unau te pawh inlan tura beisei an nih thu News.com chuan an tarlang a. He film thar director tur hian Terence Nance chu beisei niin, Black Panther lama lo tel tawh Ryan Coogler chu executive producer ni tura beisei a ni bawk.

Walking Dead star Sonequa Martin-Green chu he film thar turah hian LeBron James-a nupui angin a chang dawn niin an sawi.

1996 kumah khan Space Jam chu tih chhuah a ni a, he film-ah hian Michael Jordan, Larry Bird, Charles Barkley, Shawn Bradley, Patrick Ewing, Larry Johnson leh Muggsy Bogues te chu an chang hlawm a. A hun lai hian a che tha hle a, basketball film-ah phei chuan box office-a sum la lut hnem ber a ni hial a, a sum lak luh zawng zawng hi £180 million a tling a ni.

Kum 34-a upa LeBron James chuan thalaite hnenah Space Jam 2 an tih chhuah huna en ngei ngei turin a chah lawk a. “Space Jam film chhuak thar tur hi kei leh Looney Tunes inzawm khawm mai piah lam thil a ni a. Chutiang teh ngawt ai chuan a lian daih zawk a. Naupangte chuan he film tih chhuah a nih hunah hian lo en ngei ngei se ka duh hle a ni,” a ti.

“He film atang hian eng ang takin nge nun kawng hi a hautak tih te, kan thil tihpuitlin tum chu bansan ngawt loh tur a nih zia te an hrethiam uar uar dawn a. Theihtawp chhuaha an tih hram hram chuan a tawpah hlawhtlinna a awm a ni tih an zir chhuak thei ang,” a ti bawk.

A sawi zelnaah, “Ka naupan lai atang tawhin superhero nih hi ka chak thei hle a, Batman hi ka duh ber thin a. Batman chu duh em em mah ila eng tikah mah Bruce Wayne ka ni ve thei dawn lo tih ka hre chiang hle a. Ka tan chuan Bruce ang kha nih ngaihna a awm lo a, multi billion dollar company president ni thei turah ka indah ngai lo hrim hrim,” a ti a ni.