English fullback hlui Gary Neville chuan English player pahnih Raheem Sterling leh Joe Gomez-te intihbuai chungchanga England coach Gareth Southgate-te hmalakna chu a thlawp thu a sawi a, Southgate hian thutlukna dik a siam ngeia a ngaih thu Neville hian a sawi bawk.

Kan hriat tawh theuh angin Manchester City leh Liverpool-te an inkhelh tumin Sterling leh Gomez-te hi an intibuaia, a tuk lawkah England tana inkhel tura an inbuatsaihnaah an pahnih hian an intibuai leha, hemi avang hian Southgate chuan Euro 2020 Qualifiers inkhela Montenegro an hmachhawn hunah Sterling hi a khelh tir dawn lo tih a lo sawi tawh.

Hemi chungchang hi Sky Sports pundit Neville chuan sawiin, “Heti ang thil thleng hi England tana ka khelh lai khan ka lo hmu ve fo tawha, a dik leh dik loh lam sawi theih ni lo mahse manager tam tak chuan hma lam em em lovin, midang hriatah an sawichhuak lo fo.

“Manager thenkhat Gareth anga sawi chhuak pawh ka lo hre nual tawh bawka, chuvang chuan Gareth hian thutlukna dik a siam ngei a ni tih ka ringa, thil thleng chungchang kha ka hre thuk bik lova, mahseGareth hian thutlukna dik a siam ngei ka ring a ni,” a ti.

England team training-na hmun St. George’s Park-ah hian Sterling hi Gomez chuan a tawngkamin a fiam na deuh hlek niin a langa, Sterling hi thinrimin Gomez hi a hrawkah a mana, player dangte’n an thelh niin chanchinbu mite chuan an tarlanga, Gomez-a mit ko ah kak ang deuh awm tih thlalak thenkhat atang chuan a hmuh theih bawk a ni.