Kum 18 mi Manchester United midfielder chuan Brazil hmachhawnin England tan a vawi khat nan a inlan, hun tawp lam minute 10 emaw vel chauh khel mah se, England boss Gareth Southgate a lungawi tawk hle.
Tun season tir lamah inhliam avangin season bul a tan thei lo, a dam hnuah erawh Erik ten Hag chuan a chhawr nasa em em. Tun season chhungin Mainoo hian United tan game 20 a khel tling tawh a, England tan koh a ni chhunzawm bawk.
Thawhlehni zan hian friendly match-ah England chuan Belgium an hmachhawn dawn, hetah hian Mainoo chuan inkhelh bul tanna hun tha a nei em tih zawh a ni a, Southgate chuan, "Tehreng mai, Kobbie hian inkhelh bul tanna chance tha tak a nei e.
"Kan squad en hian, a position-ah khel player kan nei tam lem lo, hei hi a chhawr tangkai thei khawp ang. Training-naah theihtawp a chhuah a, a chet danah kan lawm a, theihna sang tak a nei a ni.
"A hmasawn zel dan hi enzui a tha a, hmasawn dan tur dik takin hma a sawn em tih te kan thlir ka ngai a ni. A game khelh danah hian a tiphut phut lo a, hahdam hmel deuhin a khel thiam.
"Kan tactic hman dan te atanga chhutin Mainoo hian England team-ah hmun a chan theih a rinawm. Player naupang tha tak tak kan nei a, ani anga rawn che chhuak thei hi an awm zel dawn.
"Mainoo hian ball a chan reng rengin hlauhthawnna a nei lo a, ball a dawng emaw a pass chhuak emaw, awlsam hmel deuhin a ti thin. Tin, hmun tawt deuh karah pawh harsatna a nei ngai lo," tiin a sawi.
Mainoo pawh hian England team-a tel chhunzawm zel chu a tum hle a, Euro 2024 squad-ah pawh tel ngei a tum ruh hle.
"Tunah chuan ka zia ta deuh niin ka hria, ka hun tawn mek pawh hi nuam ti takin ka hmang thei tawh.
"United tana ka inlan hnu lawkah England-in min ko. Engkim hi a ni vut vut ni berin ka hria.
"Tun season atana ka tum ber chu England tana khelh hi a ni ta mek, England squad-a tel ngheh a, European championship-a tel ve ngei ka duh.
Sawmna : Website advertisement hi min click sak ve thin turin kan sawm a che u.
"Ka duhthusam a puitlin theih nan club lamah ka chetthat a ngai a, theihtawp chhuahin ka bei ang," tiin Mainoo chuan Brazil a hmachhawn zawm khan a sawi.