05 Dec 2018 07:30

inkhel

Southampton manager thar Ralph Hasenhuttl

Southampton chuan Ralph Hasenhuttl chu an manager thar atan an ruat fel a, thla 18 chhungin manager 4 an nei tling ta der a ni.

Tun season-ah Southampton chuan bul an tan tha lo hle a, Premier League game 14 khelhah vawi khat chiah chak hmel an hmu thei a, a mawng ber atanga chhiar a pathunaah an awm mek a. Hei vang hian Thawhtanni khan an manager Mark Hughes chu an ban a, a aiawh tur hi an melh nghal a, Ralph Hasenhuttl hi an ruat zui ta a ni.

Kum 51-a upa Hasenhuttl hian May thla khan German club Leipzig chu a chhuahsan a, hemi hnu hian hna dang a chelh leh ta rih lo a. Southampton nen hian kum hnih leh a chanve chhung atan contract an ziak a, 2021 thleng an inzawm phawt dawn a ni.

Germany velah chuan Hasenhuttl hi a che chhe lem lo hle a, Ingolstadt chu 2015 khan second division champion nihpuiin Bundesliga-ah a kaipui a, hetah hian awm zui thei turin a kaihruai zui a. 2016 khan Bundesliga lama kai thar Leipzig chu a enkawl leh a, an club in Bundesliga an khelh hmasak ber season-ah hian pahnihna a nihpui a, UEFA Champions League khel thei turin season a kharpui bawk a ni.

Season tharah Europe khawmualpui inelna lamah an tel chho a, Bundesliga-ah parukna a nihpui a, tun season-ah Europa League an la khel pha ta tho a. May thla khan contract thar chungchangah an inrem theih tak loh avangin club chu a chhuahsan ta a ni.

2012 atanga Premier League-a awm chho Southampton hian club lian ho player duh loh chu an phak ang angin an lo fawm khawm ve thin a, Europe khawmualpuiah player man tlawm zawka lei tur an dap kual ve reng a. Tun hnaiah an che fuh thei ta meuh lo a, an dinhmun tlahniam chho mek siam tha tur hian Ralph Hasenhuttl lakah beiseina sang tak an nei a ni.

Austrian manager Ralph hian Inrinni hian Premier League game hmasa berah che fuh thei bik lo Cardiff City a hmachhawn dawn a ni.