Southampton lakah City an tlawm

06th July 2020, 07:07AM

Premier League inkhelah Manchester City chuan St. Mary’s Stadium-ah Southampton an tlawha, City hian Southampton hi si khat faiin an hneh lo.

Goal awmchhun khungtu hi Che Adams a ni a, English footballer kum 23 mi hian Saints chu point 3 pawimawh tak a hlawhchhuahpui.

Khelh 33-ah City hian point 66 hlawhchhuak tawhin, pahnihnaah an awm chhunzawm zela, Southampton hian khelh 33-ah point 43 hlawhchhuak tawhin, 13-naah an awm ve mek bawk.

He inkhelah hian City hian ball chang tamin, chance pawh insiam hnem daih zawk mahse Saints defence an thiat thei lo tluan zaka, point 3 an hloh phah.

Saints defence a khawng tha hle a, City hian an lakah shot 23 lai nei mahse pakhat mah an chhuah lova, ball chang tlem zawk leh chance nei tlem zawk ni mahse an tumruhna avangin chak an phu hle a tih theih awm e.

Goal awmchhun khung Adams hian a vawi khat nan Premier League-ah goal khungin, a goal hmasa ber hmangin Saints hian season hmasa champion leh champion thar sawp zo chiah tu an hneh.

Goal hi inkhel tan tir lama lut a ni a, 15mins vel chauh khelh a nihin Adams hian City goalkeeper Ederson a line-ah a awm lo tih hmu in, yard 40 vela hla atangin goal a khunga, inkhela goal awmchhun khungin, Saints in hnehna pawimawh tak an chang.

City hi tun season-ah away-ah vawi 7 lai an tlawh tawha, a zawnin vawi 3 away-a an tlawmna ni bawkin, Pep Guardiola hian a team enkawl tawh a zawna away-a vawi 3 a tlawmpui vawi khatna a ni.

Southampton 1-0 Manchester City

(Adams 16’)

Player Ratings

Southampton: McCarthy 9, Walker-Peters 8, Bertrand 7, Bednarek 9, Stephens 9, Romeu 7, Ward-Prowse 8, Armstrong 7, Redmond 6, Adams 8, Ings 8... Subs: Long 6.

Manchester City: Ederson 6, Cancelo 6, Zinchenko 5, Laporte 6, Garcia 6, Fernandinho 6, Silva 6, Bernardo 5, Mahrez 5, Sterling 6, Jesus 6. Subs: De Bruyne 6, Foden 6.

Copyright © inkhel.com 2024. All rights reserved.