07 Sep 2018 03:25

inkhel

South Korean infiammi leh pop star dinhmun a inang lo

South Korea football team te chu Indonesia rama Asian Games neih zawh takah an champion a, hemi hnu deuh lawkah boy band BTS chu chart-ah a chungnung berah an awm ve leh a. Heng pawl pahnihte hian an ram hming an titha hle a, mahse an dinhmun erawh a inang zui lo hle.

Footballer Son Heung-min chu English Premier League club Tottenham Hotspur ah a khel mek a, an ram team te chu Asian Games gold medal a lakpui a. An ram football team a tel zawng zawngte hi South Korea sorkar chuan a lawmpui zia lantir nan thla 21 chhung sipaia tang lo turin a ti a ni.

Asian Games-a tel infiammi 42 zette chuan gold medal an dawn avangin sipai tan hi an pumpelh thei dawn a. South Korea sorkar chuan an rama thalai mipa te chuan kum 28 an tlin hma ngeiin sipaiah an tang ngei ngei tur a ni tiin thuchhuah an siam a. Tun hnaia infiamna kutpui a gold medal dawngte erawh chu an ngaidam a, 2020 Tokyo Olympics a gold medal la pawh ngaihdam an tum bawk a ni.

Thalaite sipaia tan tur tih thupek hi 1973 atangin an hmang tan a, tunhma atang tawhin infiammi mai bakah classical musician leh ballet dancer te, ram chhung leh khawvel pum huap thila pakhatna ni thei chin chu an lo ngaidam tawh thin a. Hetih lai hian khawvel hriat hlawh khawpa pop star lar chhuakte chu ngaihdam theih zingah hian an tel lo a ni.

BTS ngaisangtute chuan tun hnai khan mi ngaihdan an la a, July thlaa ngaihdan an lakah hian chhanna 500 an dawng a, heng zinga 48% te chuan infiammite an ngaidam thin chu tha an tih thu an sawi a, 44% te chuan sorkar thil tih dan chu tha an tih loh thu an sawi ve bawk a ni.

Sipai tan pumpelh theihna kawng a ni tih hriain Son pawhin Premier League lama a mawhphurhna kalsanin Jakarta khawpui a pan vang vang a. Kum 26-a upa Spurs forward hian a tifuh hle mai a, rilru hahdam takin Europe lamah a let leh thei a, sipai tan lampang ngaihtuah miah loin Premier League khawvelah a tal chhunzawm thei a ni.

South Korea goalkeeper Cho Hyun-woo pawh army team Sangju Sangmu a khel turin a inziak lut vek tawh a, mahse an champion leh si avangin kum 26-a upa Cho Hyun-woo hian a lo suangtuah thin angin hmun dangah khelhna tha a zawng thei dawn a ni.

Cho chuan, “Mi tam zawk chuan Europe khawmualpui lam pan turin min beisei a, theihtawp chhuahin Europe vela khel thei turin ka tha ve tawk a ni tih lan chhuahtir ka tum a ni,” a ti.

Football khawvela hetiang boruak a awm mek lai hian mahni kawng zawh lama che tha ber nih ngawr ngawr chu a tawk vek lem lo hle a. Football team in Asian Games gold medal an lak atanga ni thum a ral chiah chuan BTS chu Billboard Artist 200 chart-ah kumin chhunga a vawi hnihna atan No. 1 ah an awm a. Hetiang dinhmuna ding thei hi tlemte chauh an la awm a, South Korea President Moon Jae-in pawhin an band chu social media kaltlangin lawmpuina thu a thawn a, “BTS in kum khat chhunga a vawi hnihna atan Billboard 200 a pakhatna dinhmun in hauh thei hi ka lawmpui tak zet a che u!” tiin a tarlang.

Hetiang dinhmun ropui takah hian BTS hi ding mahse an band member pasarihte chu a hmaa Korean band lar Big Bang te ang bawkin sipaiah an tan zui ve ngei chu a ngai dawn ta tho a ni.

Kumin July thla khan eptu pawl member Ha Tae-kyung chuan sorkarin sipai tang lo tura a ngaihdam theih dan hi a zawt chiang tawh a ni.

Ha chuan, “Mipui nawlpui, a bikin thalaite chuan ram hrang hrangte inelnaa pakhatna nih leh Billboard chart a pakhatna nih theih chu eng nge a danglamna ber tih hi an hre duh a. Ram hming an titha ve ve a, mahni kalna lamah a chungnung ber an ni ve ve a, a ropui dan a inang vek lo em ni?” a ti.

Prime Minister Lee Nak-yon chuan tun kar tirah khan cabinet committee a kaihruai a, sipai tan hun chhung chu thla 21 atanga thla 18 a tihtawi chungchang an ngaihtuah a. Sipai zat pawh 6,18,000 atanga 5,00,000 a tihtlak an sawi bawk a. Inngaihdam theih dan chungchang pawh thlir chiang leh turin thuneitute chu a chah bawk a ni.

Boruak inang lo tak karah Son Heung-min chuan a kawng zawh mek a chhunzawm leh dawn a, thil dang vei tel loin football a khel leh dawn a, BTS tan erawh sipai tan hun a hnaih belh zel thung a ni.