Premier League inkhelah Tottenham chuan an mikhual Burnley chu 5-0 laiin an hneha, Tottenham player Heung-min Son chuan goal pui tak a khung.

Spurs tan hian he inkhelah hian Harry Kane chuan goal hnih a khung bakah Lucas Moura, Son leh Moussa Sissoko-te chuan goal khat theuh an khung bawka, Spurs hian point 3 hlawhchhuakin paruknaah an chho.

Son hian Spurs goal thumna a khunga, darkar chanve chuang hret khelh a niha a thun niin, anmahni box bul lawk atangin lehlam box thleng ball a khalh tlanga, goal a khunga, mi tam tak chuan Goal of the Season dawng turah an dah nghal tawp.

Spurs manager Jose Mourinho chu Son-a goal thun dan chuan Ronaldo a hriatchhuah tir niin a langa, mahse Cristiano Ronaldo ni lovin Brazil Ronaldo kan tih mai zawk kha a ni.

Mourinho chuan Son-a goal chungchang sawiin, “He goal a awm hma pawh khan ka fapa chuan Son hi Son-aldo a ti tawh thin a, Son-aldo Nazario ti thinin vawiin khan Son-aldo Nazario a ni ngeiin ka hria,” a ti.

Mourinho hian Son-a goal chuan kum 1996-a Barcelona forward Ronaldo-a’n Compostela laka goal pui tak a thun kha a hriatchhuah tir thu a sawi a, hetih hun lai hian Mourinho hi Barcelona manager Sir Bobby Robson-a hnuaiah a la thawk.

Mourinho chuan sawi zelin, “Son-a’n khati ang taka goal a khung khan rilruah thil pakhat chiah a rawn luta, chu chu Sir Bobby Robson-a bula ka thut lai ngei, Barcelona leh Compostela kum 1996-a a inhmachhawn tuma Ronaldo Nazario-a goal khung kha a ni a, khami tum khan Ronaldo khan midfield line hnung daihah ball changin Son-a goal khung ang deuh khan goal mawi em em a khung a ni,” a ti.