Solskjaer leh Mourinho an danglam vak lo: Paul Ince

18th April 2019, 10:04PM

Paul Ince chuan Manchester United chu hmasawn lam aiin hnungtawlh zawngin an kal mek nia sawiin, Ole Gunnar Solskjaer chu Jose Mourinho nen an danglamna a awm vak loh thu a sawi.

Portuguese coach Jose Mourinho chu 2018-19 season chhunga United an chet that loh em avangin nikum December thla khan club thuneitute chuan an ban a. Mourinho leh an player pawimawhte inkar boruak a fuh lo chho hle a, squad in beisei an pha lo viau chung pawha a ngai renga an awm rei chuan sawn a hlawh hman hle a ni.

Miin Mourinho an sawiselna chu a dik thawkhat hle a, an ban hnuah a hmun ruak luah tur hian Ole Gunnar Solskjaer chu an ruai zui a. Tun season kal mek tawp thleng atan an inbe fel phawt a, United chu a chet thatpui viau nghe nghe a, hei vang hian club thuneitute chuan kum thum chhung atan contract pangngai an ziahpui ta nghe nghe a ni.

Hun a liam zel a, an rawn ri hluai boruak kha a dai tial tial a, Champions League-ah pawh an zinkawng a tawp tawh a ni. Premier League-ah chuan club dang pali te nen a chungnung pali zinga awm theih an inchuh chho mek a, FA Cup-ah pawh an zinkawng a a tawp tawh bawk a ni.

Red Devils midfielder hlui Paul Ince chuan United hmasawnna chu a tawp tawh rih nia sawiin, “Ole Gunnar Solskjaer hian United hi hma sawnpui zel a tum a, mahse a hna hi a hautakin a khirh tak zet a ni,” a ti.

“United tantute chuan dawhtheihna an neih that a ngai viau dawn a, a chhan chu he club hi an elpui dangte aiin nasa takin an hniam tawh rih tlat a. Ka rilru tibuaitu ber chu a ngheta Ole Gunnar an la ta hi a ni a, khami hnuah khan team dangl daih an ang ta riau a ni,” a ti bawk.

A sawi zelnaah, “A nghet loa Solskjaer-a’n club a enkawl lai kha chuan an boruak a kang hle a, khelmualah an hlauhawm a, chet pawh an che tha thei hle a. Mahse, manager nghet atana contract a ziah hnuah chuan an inkhelh dan pawh a inthlak nghal daih a, a hma ang kha an ni thei tawh lo reng reng. A ngheta an dah hnuah chuan United hi a hnungtawlh zawngin an kal tlat a ni,” a ti.

Ince chuan, “A hma daih khan ka lo sawi lawk tawh a, Solskjaer hi a ngheta an la a nih chuan a dan a dang vek dawn tiin ka sawi a. Hna nghet a nih tawh chuan a boruak a sang a, a delhtu a rit viau tawh thin a, chu chiah chu tuna Ole Gunnar harsatna hi a ni,” a ti.

“A hma kha chuan khelmuala an chak theih chuan thil tha tak a ni mai a, tunah chuan a chungnung pali zinga tel theih beiseina an nei mek a, hei hian an boruak pawh a tidanglam vek tawh a, player te pawhin delhtu lian tak an nei ve tawh bawk a. Tunah hi chuan Jose Mourinho hnuaia an khelh thin dan ang mai kha an ni leh tan tawh a, Solskjaer hi Mourinho nen an danglam vak lo a tih theih a ni,” a ti bawk.

Copyright © inkhel.com 2024. All rights reserved.