11 Aug 2019 04:06

bakteaJr.

Mizo tlangval

​Solskjaer leh Lampard inhmachhawn zan

2019-20 Premier League season khelh tan leh mek a ni a, team tam zawkin an game hmasa ber an khel tawh. Zaninah Manchester United leh Chelsea-te chuan an game hmasa ber an khel ve dawn a, team hnihte hi an inhmachhawn dawn.

Old Trafford-ah United hian Chelsea hi an lo mikhual dawna, kan sana dar 9:00-ah an inkhel dawn. He inkhel hian ngaihven a hlawh sa renga, mahse tun season erawh tum danga thil la awm ngai lo avangin he inkhel hian ngaihven a hlawh lehzual.

He inkhelin ngaihven a hlawh zual em emna chhan chu Manchester United leh Chelsea te hi tunah hian an club legend-te’n an enkawl ve ve a, United hi an striker hlui Ole Gunnar Solskjaer chuan enkawlin, Chelsea hi an club chanchina goal khung hnem ber Frank Lampard chuan a enkawl ve mek bawk.

Solskjaer hian season hmasa chawhnu lam atang khan United hi a enkawl tawh a, a tir lamah chet that pui hle mahse a hnuah a chhe tha zui lem lo. Chelsea hian Lampard hi tun nipui khan Derby County atangin an lalut ve thunga, Lampard-a hnuaiah Chelsea hian a vawi khat nan competitive match an khel dawn.

Season bul tanna a ni a, inkhel a pawimawh nghala, point thum hlu tak hlawhchhuah tuma inkhel hi a hmuhnawm a beiseiawm hle.

United hian tun nipui chhung khan player pathum an laluta, Harry Maguire chu Leicester City atanga laluta, a manah pound maktaduai 80 lai sengin, English defender hi khawvela defender manto ber a ni. Maguire bakah United hian Aaron Wan-Bissaka leh Daniel James-te pawh lalutin Maguire leh Wan-Bissaka hian Chelsea lakah inkhel bul an tan nghal ngei a rinawm.

Chelsea hi FIFA-in bazar thei lo tura an hrem avangin player lei thar an nei lova, mahse season hmasa-a loan-a an kawl Matteo Kovcic chu a ngheta an lakluh bakah kumin January thlaa an lei fel tawh Christian Pulisic pawhin London club hi a zawm fel tawh. Callum Hudson-Odoi a inhliam avangin Pulisic hian inkhel bul a tan ngei a rinawm a, N’Golo Kante a khel thei lo a nih chuan Kovacic pawh hian inkhel bul a tan ngei a rinawm bawk.

United tan hian Eric Bailly a khel thei dawn lo chianga, Alexis Sanchez a khel thei dawn em a la hriat loh bawk. Chelsea tan hian Antonio Rudiger a la khelh theih a rinawm lova, ani bakah hian Ruben Loftus-Cheek leh Hudson-Odoi te chu khel thei lo tur chiang an ni a, Kante a khel thei dawn em hriat a la ni lo bawka, Kante hi a khel a nih pawhin minute 90 a khelh a rinawm loh a ni.

Predicted line-up:

Manchester United- De Gea, Wan-Bissaka, Lindelof, Maguire, Shaw, Matic, Pogba, Mata, Lingard, Martial, Rashford.

Chelsea- Kepa, Azpilicueta, Christensen, Zouma, Alonso, Jorginho, Kante, Willian, Barkley, Pulisic, Giroud.