Premier League inkhelah Manchester United chuan Goodison Park-ah Everton an tlawh a, United hi 4-0 in mualpho takin an tlawm.

United hi khual mualah a zawnin vawi nga inelna hrang hrangah an tlawmna a ni a, hetiang taka khual muala an chet chhiat hi kum 1981 March thla hnuah a vawi khat thlen lehna a ni.

Everton lakah United hi an khel chhe em em a, eng an ti ve thei lo. Nikum December khan Jose Mourinho banin United hian an striker hlui Ole Gunnar Solskjaer an ruaia, Solskjaer-a hnuaiah bul tan tha viau mahse an tlahniam leh nasa tawh em em a, an khelh hnuhnung vawi 7-ah vawi ruk lai an tlawm tawh.

Everton laka an mualpho zawhin United manager Solskjaer chuan an supporter-te lakah thupha a chawi a, Manchester United tih hming pu tlaka an khelh loh thu a sawi bawk. Norwegian manager chuan, “Everton lakah khan engkim a kal sual a ni ber a, kan khel chhia a, khelmual chhungah khan min hneh vel vek a ni.

“Manchester United kawr kan ha a nih chuan birukna tur a awm lova, kan khel tha tawk lova, United hming pu tlakin kan khel lo. Club aiawhin fan-te hnenah ngaihdam ka dil duh a, kan supporter te lakah thupha kan chawi takzeta, kan that loh ber lai pawhin kan tan an rinawm em em reng a ni,” a ti.

Sawi belhin Solskjaer chuan, “Paruknaah kan awm mek a, kan awm duhna hmun atangin kan hla hle. Manchester City kan tum hunah eng ang taka tha nge kan ni tih lan tirna hun tha tak kan nei. Hna thawh tur hautak em em kan nei a, mahse kan ti hlawhtling ngei dawn. He club hi lo tlu tawh thin mahse kan insanmar a kan thawhkan leh ngei a ngai a ni,” a ti bawk.