Dennis Smith Jr. chuan Zirtawpni khan thla thara All-Star Weekend ah slam dunk contest a tel ve a tum thu a sawi.

Dallas Mavericks point guard Dennis Smith Jr. hian Mavericks in 106-101 a Detroit Pistons an hneh hnuah slam dunk contest a tel a tum thu hi a sawi chhuak a. A hmain tel tum lo niin a lo insawi tawh a, mahse tun hnaiah a rilru hi a thlak leh ta a ni.

Nikum khan Dennis Smith hi slam dunk contest ah chuan a lo tel tawh a, mahse first round ah a tla nghal a. Nikum September thla khan kumina slam dunk contest neih turah hian tel a tum loh thu a lo sawi tawh a. Tel a tum loh chhan chu a chhehvel boruak chu a mil ve vak loh thu a sawi a ni.

Zirtawpni khan Dennis Smith chuan a rilru a thlak leh tawh tih sawiin, February thlaa slam dunk contest neih huna tel a duh leh thu a sawi a. Hetianga a rilru a thlak chhan chu a pi vang a nih thu a sawi tel a ni.

Kum hmasa lamah khan Dennis Smith hian vawi hnih dunk ah prop a hmang miah lo a. A dunk hmasa zawkah chuan two-handed reverse hmangin a dunk a, ball chu a luah la kualin a khup hnuai lamah a la kual leh a, judge te chuan point 39 an pe a, hei hi hniam a tih thu a sawi a. A dunk hnuhnung zawkah chuan 360 windmill entirin judge te chuan score sang thei ber 50 an pe a ni.

February 15-17 chhung hian Charlotte, North Carolina ah All-Star Weekeng hun hi an hmang dawn a. Smith hi Fayetteville, North Carolina lam mi a ni a, mahni chawr chhuahnaa chetla tur a ni bawk a, che fuh thei tura ngaih theih a ni.

Smith hi Rising Stars game a beiseiawm ber pawl a ni a, nikum khan a vawi khatna atan a lo tel tawh bawk a. Hetih lai hian Dirk Nowitzki pawhin Zirtawpni khan 3-point contest ah tel a tum thu a sawi chiang a, 2008 hnuah 3-point contest ah hian a tel leh hmasak ber niin, a pumpuiah vawi 6 a telna a ni chiah dawn a, 2006 khan pakhatna a lo ni tawh a ni.