Haitian Striker Kervens Belfort-a goal khat thun hmangin Kerala Blaster chuan an mikhual Delhi Dynamos chu ISL 2016 Semi final 1st leg-ah an hneh.
Sunday tlaia Jawaharlal Nehru Stadium, Kochi-a inkhelah team pahnih danglamna thllentu chu Kervens Belfort niin, FC Sion striker lo ni tawh hian minute 65’ ah he inkhela goal awmchhun hi a thun.
Kerala Blasters FC 1 - 0 Delhi Dynamos FC
Kervens Belfort 65'
Kerala Blasters XI: Nandy (gk), Jhingan, Hengbart, Hughes (c), Josu, Vineeth, Mahamat, Hossain, Belfort, Rafi, Nazon
Delhi Dynamos XI: Doblas (gk), Konsham, Rocha, Anas, Souvik, Tebar, Marcelinho, Milan, Malouda (c), Lewis, Gadze
Kerala Blaster hian 4-2-3-1 formation hmangin, suspend hnua lo kir Mehtab Hossain leh Azrack Mahamat-te chu midfield-ah dah niin, Vineeth, Rafi, Nazon leh Belfort-te chu hmatawngah awmin, left back Josu a lo kir a, defence laiah A.Hughes leh C.Hengbart ten an hmun ngai an luah bawk.
Delhi Dynamo lamah pawh thil danglam teh chiam a awmlo. An hman than 4-3-3 formation ngai a ni a, Mercelinho, Gadze leh Kean Lewis-te thlawp turin midfield laiah Malouda, Milan Singh leh Marcos Tebar-te an awm thung. Kerala chhulchhuak Anas leh Ruben Rocha-te chu a laiah dingin, full back pahnih chu Chinglesana leh Souvik Ghosh-te an ni.
Jawaharlal Nehru Stadium-a inkhelah hian mikhual team lamin bul tan hmasain hun tha an nei nghal, chumi hnu reiloteah Mercelinho hnen atanga ball tha tak hmutu Malouda shot chu tackle vanga tihbuai nilo tase chuan ball hlauhawm tak a ni ngei ang, hun remchang siam chhunzawm nghal thei turin corner erawh a hlawhchhuak tho.
Kerala lamin attack ve leh nghalin, Belfort-a'n dinglam sira awm Vineeth ball pein, a goal shot erawh net sirah a kal thung. Mawilo taka Malouda a tihtluk avangin Mehtab chu minute 6’-na lekah yellow card pek a ni a, mahse Kerala lam an khel tha telh telh thung. Minute 19-na a Belfort shot Anas-a'n a lo dansak chu uiawm tak a ni. Josu chu Minute 23’ naah booked ni veleh in, a hnu minute hnih a ral awrh tih a pelnalty box pawn chiaha Mercelinho a sut luih avanga red card a hmu lo erawh a vannei thlawt.
Steve Coppell-a'n hlauhthawn a neih avangin minute 31’ naah Josu lachhuak in, a aiah Didier Kadio a dah lut a. Mercelinho erawh nuamti takin a khel chhunzawm a, lut thar Kadio tan hna tam a tling. Mahse Mercelinho-te'n tih theih an nei tam lo, chutih laiin Kerala blaster an khel tha telh telh a, Belfort-a ball pass tha tak mai Nazon-a'n shot nghalin; Anas bawkin a lo dan sak leh a, hand ball nia ngaiin Belfort-a'n beisei nei mahse referee ngaihdan erawh a dang thung. Minute 45’ naah uihawm takin Belfort-a'n Delhi keeper Doblas a pass ringawt, first half a zo zui.
2nd half-ah player siksawi a awmlo a, Kerala lamin chance nei nghalin Anas-a'n Raji a tihtluk avanga freekick atanga ball lo kal chu Jhingan chuan a tauh fuh teuh hle. Kerala lam hian ball chang tamin inkhel thunun viau mahse goal erawh an thun thei mai bik lo, minute 61’-naah Nazon-a'n shot tha tak neiin goal ban bul chiahah Doblas chuan a dan sak . Chumi hnu minute khat pawh a ral hman lo tihah Kerala team chuan hlawhtlinna hmuin Belfort hmangin goal an thun ta nge nge. Hemi tum hian Anas bawk rawn inrawlh lehin, tun tumah erawh Haitian striker a dang zo ta bik lo a ni.
Minute 65’-naa Belfort-a'n goal a thun hnuah Delhi lam an tang sawt a, Mercelinho bawk rawn langsar lehin goal erawh a la pai tello cheu..!! Minute 71’-naah Milan Singh thlakin Malsawmzuala rawn tlan luhtir a ni a, game erawh a dang tehchiam lova, Kerala lam bawk counter attack hmangin an hlauhawm chhunzawm. Steve Coppell-a’n minute 76’ naah Belfort la chhuakin A.German a rawn dahlut a, Belfort-a'n ground a chhuahsan laia mipui thawm chu ring tak a ni.
Zambrotta-a’n a substitute hmang zovin, Tebar leh Chinglesana-te la chhuakin mizo tlangval Lalchhawnkima leh Memo te minute 82’-ah a rawn tlan luhtir a, hemi hnu reilo teah Kerala lamin D.Nazon la chhuakin Michael Chopra an dah lut ve bawk a, team pahnih substitution siamin game-ah awmzia a nei tawh lo a, hun tawp hma hretin A.German leh Gadze ten yellow card an chawi a, hun a tawp zui.
Kerala Blaster-in 1-0 a hnehna changin dinhmun duhawm zawkah an ding mek a, Zambrotta leh a hote hian an khelmuala chak loh an duh dawn loh avangin game hmuhnawm tak hmuh inbeisei phawt ang. Nizan match-ah chuan chak phu zawk leh khel tha zawk Kerala Blaster-in hnehna an chang a, Delhi lam pawhin theih tawp chhuaha inpuahchaha tho chhuak leh turin tan an la ngei ang, ISL Semi final 2nd leg hmuhnawm lehzual kan hmu ngeiin a rinawm.
Pictures credit : ISL