29 Nov 2018 05:37

inkhel

Sixers in hma kan sawn zel dawn: Ben Simmons

Ben Simmons chuan Philadelphia 76ers chu Eastern Conference-ah an tha chho zel dawn tih sawiin, tunah chuan hmasawnna kawng an la zawh tan chauh niin a sawi.

Tun hnaiah Philadelphia 76ers hi an che tha chho hle a, an game hnuhnung 7 ah vawi 6 an chak thei a, Ben Simmons chuan hei hi an tawpna tur a la nih mai loh thu sawiin, hma an la sawn dawn tan chauh niin a sawi a ni.

Sixers hi East ah chuan pathumnaah an awm mek a, Minnesota Timberwolves atanga Jimmy Butler an lak hnuah phei chuan an che fuh chho viau a. Philly hian Jimmy Butler an lak rual hian T-Wolves lamah Dario Saric leh Robert Covington te an kaltir ve thung a, hei hi an tifuh ta hle a ni.

Nilainia 76ers leh New York Knicks te inkhelh tumin Jimmy Butler chuan point 7 chauh a thun a, Joel Embiid chuan point 26 thunin rebound 14 a lak bakah assist 7 a nei a, Philadelphia chu 117-91 in an chak a. An chak hnu hian Ben Simmons chuan an team chuan hma an sawn belh zel dawn tih thu hi a sawi chhuak a ni.

He inkhela point 14 thun a, rebound 8 laa assist 7 neitu Ben Simmons chuan, “Team hrang hrang leh game hrang hrangte chu a inang thei lo a, an danglam vek hlawm a. Keini pawhin hma kan sawn chho zel a, season kan hman chhoh zelah kan dinhmun pawh a tha ve tial tial a. Jimmy pawh kan team ah a insiamrem tial tial a ni,” a ti.

A sawi zelnaah, “Kan team kan inman tial tial a, kan khel pawh a tha telh telh bawk a. Team ang tak takin kan che a, hma pawh kan sawn viau a, hei aia nasa hian hma chu kan la sawn belh zel ka ring,” a ti bawk.

Sixers coach Brett Brown pawhin hma an sawn thu hi a sawi ve bawk a, tun aia dinhmun tha zawk an luah theih zel a beisei thu pawh a sawi bawk a ni.