England leh Manchester United legend Sir Bobby Charlton chu kum 86 mi niin a thi a, Charlton-a chhungte chuan England-a Inrinni zinglam khan thlamuang takin Charlton hian a nunna a thlah tih an puang.

Charlton hi Manchester United leh England player lo ni tawh zinga ropui berah mi tam tak chuan an ngai a, hemi mai ni lovin English sportsman ropui bera ngaitu pawh an tam hle a ni. Charlton-a thih chhan tak hi tarlan a la awm lova, mahse kum 2020 November thla khan dementia a nei tih hmuh chhuah a lo ni tawh.

England tan Charlton hian game 106 khelin goal 49 a khung a, hun rei tak England top scorer a ni nghe nghe a, kum 1966-a FIFA World Cup-a England an champion khan an player pawimawh ber tih theih a ni a, Golden Ball lawmman a dawng.

Football history-a player ropui ber pakhat Charlton hian sawi lam tawh angin kum 1966 khan World Cup-ah England a champion pui a, hemi kum hian football-a mimal lawmman hlu bera ngaih Ballon d’Or dawng bawkin, kum 1967 leh kum 1968 te khan Ballon d’Or-ah pahnihna dinhmun a hauh ve ve bawk.

Charlton hi United academy chhuak a ni a, a football career pumpui deuh thaw hi United-ah a hmang. United tan kum 1956 khan a game hmasa ber khelin, kum 1973 khan a chhuak a, Charlton hian Manchester United tan hian game 758 khelin goal 249 a khung a, Wayne Rooney chiah Charlton aia United tana goal khung hnem zawk a awm a, United hi English top flight league-ah vawi thum a champion pui bakah a, FA Cup leh European Cup te vawi khat ve ve a chawi a ni.

United a chhuahsan hnuah Charlton hi Preston North End, Waterford, Newcastle KB United, Perth Azzurri leh Blacktown City tan te a khel leh a, kum 1980 khan inkhelh a chawlhsan.

Charlton a awm tak loh avangin kum 1966 England World Cup champion squad atangin Sir Geoff Hurst chiah a dam tawh a, Hurst hian kum 1966 World Cup final-a England in West Germany 3-2 a an hneh tum khan hat-trick a siam a ni.