Sir Alex Ferguson chuan Manchester United a enkawl laia inchhirna a neih thenkhat a sawi chhuak a, final an khelh thenkhatah Park Ji-sung leh Dimitar Berbatov te a khelhtir lo thin kha pawi a tih thu a sawi.
Football khawvela manager zinga ropui berte zinga mi Sir Alex Ferguson chuan Manchester United chu khawvela club ropui berte zingah a hlang chho thei a. Kum 26 chhung zet United a enkawl chhung khan hlawhtlinna hmel duhawm tak a hmu hnem hman hle.
Manchester United chuan Sir Alex Ferguson kaihhruaina hnuaiah title an la hnem hman hle a, Premier League title 13 ngawt an lak bakah UEFA Champions League title pawh vawi hnih chu an la bawk a. Europe khawmualpuiah chuan club hlauhawm berte zinga chhiar tel an ni.
Scot pachal Sir Alex hi manager zingah chuan trophy leh chawimawina la hnem berte zinga mi a ni chiang hle a. A kaihhruaina hnuaiah hian Manchester United chu Champions League title pahnih lak belh thei dinhmunah an ding bawk a, mahse 2009 leh 2011 final-ah te khan Barcelona an hneh ta lo thung.
Football khawvel atanga a chawlh hnuah Red Devils chuan lei rem an rap leh thei ta meuh lo a, 2018-19 season-ah pawh khan an tum angin an awm hleithei lo a, Premier League club chungnung pali zingah pawh an tel thei ta lo a. Season tharah UEFA Champions League khelh phak tum viau mahse Europa League an khel dawn a ni.
Pa luhlul ve tak mai Sir Alex Ferguson chuan Old Trafford-a a awm chhung khan a tih tawh chu kaltlangpui a tum viau thin a, tih fuh tam tak a neih rualin, tih fuh loh deuh pawh sawi tur a awm nual bawk a. Tun hnaiah thutlukna a siam thenkhatah inchhirna a neih thu hi a sawi chhuak ve leh hnuhnawh a ni.
An kawmnaah Sir Alex chuan a inchhir ber chu 2008 UEFA Champions League final-a Chelsea nen an inkhelh tuma Park Ji-sung a khelhtir ve ta lo kha a nih thu a sawi.
Sir Alex Ferguson chuan, “European Cup champion han nih kha chu a ropui em em mai a. Player tha tak tak kan nei nual a, an rilru put hmang kha a fuh chho hle a, kan squad kha an fuh em em bawk a ni,” a ti.
“2008 final-ah khan tih fuh loh deuh mai ka nei a, tun thleng hian ka la inchhir phah nghe nghe a. Park Ji-sung kha squad-ah ka telh ve ta lo a, lo telh ta ila, khelhtir ngei bawk ila, a che tha viau dawn si a. Final meuh han luh chuan rilru pawh a buai ve nuaih thei a lo nih kha,” a ti bawk.
A sawi zelnaah, “2011 final-ah khan Wembley Stadium-a Barcelona nen kan inkhelh tumin Dimitar Berbatov kha squad-ah ka telh lo leh bawk a, a thinrim viau nghe nghe a. Khatianga telh ve loh han nih kha player tha pangngaite chuan an phu lo a, final luh tawh hnua squad-a telh loh bik nih kha player te hian an phu hauh lo a ni,” a ti.