Portuguese manager Jose Mourinho kha Real Madrid-a a awm lai khan Manchester United nen sawi zawm a ni a, mahse Manchester United chuan Everton manager David Moyes kha an chhawr ta si a, Mourinho khan United pan a chak hle nitein an sawi nghe nghe a nih kha.
Mourinho chuan Chelsea nen an kar thu a that em avangin Sir Alex Ferguson khan sawm enah a en lo hrim hrim niin a sawi chhuak.
"Khawvela manager zawng zawngin Man Utd chu club lian niin an ngai vek. Kei erawh Chelsea-a kir leh ka duh. United nen khan dawhkan kan kil ho lo, a chhan chu Real Madrid atang khan Chelsea-a kir leh ka duh tih Sir Alex-a khan a hre chiang em a ni," tiin Mourinho chuan bbc a hrilh.
Sir Alex Ferguson-a'n United manager hna a chawlhsan hnu khan David Moyes an ruai chhunzawm a nih kha, mahse season khat pawh a enkawl tlin hmain an ban ta a. Khami chungchang kha Sir Alex-a chuan a lehkhabu thar"Secrets of Success," -ah thai langin,
"David Moyes kan chhawr kha tihsual a ni lo. Chutih laiin Ryan Giggs khan kum ruk emaw kum sarih emaw hma lam khan Football lo chawlhsan selang chuan United manager tur a ni ang," tiin Ferguson chuan a sawi.
A ban dawn tak takah khan Ferguson chuan United enkawl turin Pep Guardiola kha a lo be ngei chu niin, mahse Pep Guardiola chuan United sawmna hi a chhang duh ta lo a ni.
picture credit : Getty