​Singapore Grand Prix-ah Vettel pakhatna

21st September 2015, 05:09AM

Marina Bay track-ah pole atanga bul tan Ferrari driver Sebastian Vettel chu pakhatna a ni a, Red Bull driver Ricciardo chu pahnihna niin, Kimi Raikkonen chu pathumna a ni a, Mercedes Rosberg erawh palina a ni.

Ram kang vangin Singapore Grand Prix hi thulh a ni tep a, mei khu nasa tak leh meivap te chuan Marina Bay track a tihbuai palh an hlau, mahse tluang takin engkim a kal a,World Champion leh Championship-a hma hruai mek Lewis Hamilton erawh a khawl a chhiat avangin a tlan chhuak ve thei ta lo a ni.

Nico Rosberg palina a nih avangin Hamilton nen an inkar chu point 41 chauh a ni ta a, intlansiak vawi 6 atangin Points 150 hlawhchhuah tur a la awm. Vettel pakhatna a nih avangin Rosberg nen an inkar pawh point 8 chiah a ni ta bawk a ni.

He intlansiak hmuhnawm takah hian lap 38 naah mi pakhat tlan kawngah a lo kal leuh leuh mai, CCTY atangin thuneitu ten an hmu a, a rang lamin safety car an tlan tir a. Vettel hmahruai mek lai a ni bawk nen, Safety Car rawn tlan hi pahnihna Ricciardo chuan a hmang tangkai teuh hle nghe nghe a ni. Ferrari chuan F1 world championship-ah vawi 224 pakhatna an nihna hmel an hmu a.

Vettel chu GP Winner vawi 42 a ni ve ta a, Senna record vawi 42 chu a khum ta a ni. Tin, Vettel hian Alain Prost-a record vawi 51 pawh a la khum mai rin a ni. Tun season-ah a vawi thum nan Sebastian Vettel hi pakhatna a ni ta a, World Championship in umna pawh tlem chuan a rawn HOT chho leh ngei dawn niin a lang.

Copyright © inkhel.com 2024. All rights reserved.